牛熊對壘：滙控博反彈吼20717

港股回調，恒指跌穿二萬二水平，低見21,832點，收市報21,944點，跌61點，跌幅尚算溫和，只是本周多件重要政治大事發生，策略宜炒股不炒市。

內地經濟觸底之說講得多，愈來愈多人Buy，恒指衝上二萬二之後，就話年底可以再升，牛熊證街貨量分布正好反映好友非常進取，周一恒牛總街貨達49.49億份，單日增逾8億份，恒熊總街貨只有17.67億份，兩者相距超過30億份，陰謀論者自不然勸大家短期要小心，大戶殺完熊就會殺牛，因目前牛證重貨區由21,599點開始，跟現價差300多點，唔算好多，要殺落都好易。

前日恒指輪證淡倉錄得2,581萬元資金流出，一反過去多日來資金持續流入淡倉的方向，同日恒指好倉見6,441萬元資金流入。昨日主板成交549億元，牛熊證成交按日增6.2%至55.4億元，佔主板比例約一成，窩輪成交則微升1.5%至66.71億元。

中移未獲炒家歡心

若然細心觀察，多次調整市當中，中移（00941）都可逆市企穩，昨日該股微升0.17%，收報87.4元。不過對於一班輪場股友，又真係嫌隻股行得慢，無速度，八月份未到80元掉頭回升，兩個幾月都係得幾蚊升幅，等到眼瞓。

滙控（00005）公布第三季業績，期內因就洗錢案調查再撥備，稅前盈利50億美元，看似差過預期，但多間大行護航，話撥備前盈利實際好過預期，唔差咁話。滙控昨日為恒指貢獻了45點跌幅，收跌1.3%，但股價即市走勢是先低後高，開市報76元，是全日最低位，收市價76.7元，接近全日高位76.85元。

相關窩輪非常活躍，是昨日最活躍個股輪，相關成交6.6億元，按日增加五成，佔輪場成交比例約一成。即市所見，有資金流入其Call輪，有信心的不妨考慮撈底，滙豐摩通購（20717）明年五月二十七日到期，行使價83.88元，實際槓桿11.3倍，引伸波幅24.2%。