股海實戰：瑞聲等調整上車

全球目光集中喺美國總統大選結果，加上大笨象（00005）季績遜預期，而港交所（00388）公布季績前亦有獲利回吐，恒指一度跌逾百點，午後跌幅收窄，收報21,944點，跌61點，成交550億元。手持嘅中傳動（00658）尋日終於開車，上過2.85元，收報2.81元，升2.9%，成交6,861萬元，希望嚟多一棍，喺3元邊食胡。

中投三寶呢輪接力發功，繼保利協鑫（03800）起動後，近日輪到旭光（00067）同中芯（00981）。唔少缸邊友提起呢三隻股都搖頭，皆因之前交過唔少學費。不過，相對唔少民企股一出事就拉閘消失，呢三隻有阿爺給力嘅股份，衰極都有個譜。

公共採購猛人登場

講到有阿爺撐場，阿莊留意咗隻尚在停牌嘅中國公共採購（01094），最近委任前華潤系高層陳樹林為聯席主席。阿莊仲好記得，當年陳氏係五豐行董事長，作風務實，五豐行被私有化後，亦先後出任過華創（00291）同母企華潤集團高層要職。今趟進入中國公共採購，係受阿爺所託出面代理相關業務，抑或係自立門戶搵真銀，就要留畀陳總解畫話，不妨密切留意。

將於今日公布季績的瑞聲科技（02018），尋日股價創歷史新高30元。翻查資料，上月大摩同巴克萊都曾發報告唱好瑞聲，前者調高其明年盈利預測，目標價36元；至於巴克萊則睇34.5元。

瑞聲一向有供應蘋果公司產品相關配件，今年以來蘋果公司頻推新產品，照計瑞聲真係做到冇停手，難怪大行一致睇好盈利前景。股價能否更上一層樓，相信季績可提供更多指引。短線策略方面，參考八月份公布中績前一周股價衝頂，但公布後就要震震倉先至再上，現時不妨以靜制動，觀察10日線27.7元承接，守穩其上先再睇位上車，下一阻力睇33元，26元為重要支持。