樓市出更：代理爭舖殺入寶盈

政府近兩年積極响將軍澳南推地，區內多幅住宅用地先後透過招標形式出售，並已陸續名花有主，再加上有新盤開售，地產代理紛紛响區內搵舖。劉Sir收到風，幾間地產代理行响一街之隔嘅寶盈花園商場租舖，租金較毗鄰嘅民生用品店，貴起碼一倍或以上，更逐漸形成一條小型地產代理街。

劉Sir收到風，地產代理行一向聚集响將軍澳中心同埋君傲灣基座商場君薈坊內，寶盈花園呢邊嘅商舖，一向以售賣日常民生用品為主，成個商場近年只有一間世紀21物業經營。

不過，隨着區內陸續有多幅地皮準備起樓及有新盤開售，地產代理行為搶佔市場佔有率，紛紛响寶盈花園落點，令呢個商場嘅租金不斷上升。

呎租過三百蚊算好高

好似搶到寶盈花園商場龍頭地舖嘅香港置業，佢哋行政總裁李志成話，個舖月租計起嚟唔算好貴，不過，以每呎嚟計就好貴，要超過300元一呎。另外，同系嘅美聯集團（01200）亦已經喺同一個商場開咗舖，舖位面積差唔多，聽講租金要成五位數字。

業主開價睇生意性質

至於競爭對手中原地產，將軍澳區揸fit人譚桂貞（Crystal）同劉Sir講，佢哋响二○○四、○五年都試過喺寶盈花園開舖。

不過，做咗兩年，佢哋覺得效果唔係太理想，所以約滿後就遷出；隨着呢區發展漸成熟，佢哋都計劃重新進駐呢個商場，並且物色緊舖位。

Crystal仲話，呢個商場好特別，即使係同一個業主持有嘅舖位，佢哋都會視乎做咩生意而開咩價。

好似地產代理舖同茶餐廳，業主一般會將舖租叫得高啲，價錢會比一般經營民生用品生意嘅舖頭，嗌高一倍或以上租金，故佢哋搵舖都好審慎，但配合行業趨勢，都會喺個場落番個點。