Fundman睇市：短炒水泥股

港匯一度升穿7.75強方兌換保證，金管局連續兩日入市承接美元沽盤，加上歐洲經濟火車頭德國公布九月零售銷售按月升1.5%，幾乎是坊間估計0.3%嘅五倍，港股昨日收市前一段愈挾愈有，經過三日整固的恒指，全日反彈213點，報21,641點，美中不足是主板成交仲未算旺，得479億，較上日僅多出19億元。

總結十月股災月恒指唔單止唔使跌，仲有801點或3.8%進帳，中央十八大及美國總統選舉在即，原先計劃十一月第一個禮拜開始鳴金收兵，分批沽貨套利，不過由近日親身感受，認識的賓架把口雖然開始轉軚信內地經濟第四季會初見轉機，但手底裏買夠貨嘅卻少之又少，落後及高beta尋寶熱應該未玩完，短炒繼續留意番水泥、消費及鐵路基建股。事實上，內地水泥價格由八月低位至今累積兩至三成升幅，尤其東部及華南一帶，產能增長也由八月開始加快，穩陣的可以留意潤泥（01313），賭博味道重啲可以睇台泥（01136）。

內地樓市經過七、八月一輪衝鋒，傳統「金九銀十」反而唔旺，搞到通街眼鏡碎。數據顯示直到上周日，內地54個城市本月共成交21.2萬套房，比九月同期跌6.4%，創半年新低，但幾隻龍頭內房股未受影響，潤地（01109）及中國海外（00688）股價距離五十二周高位只不過1到2%，主因是對比其他對手，首三季兩者已完成全年售樓目標八成，埋單計數超額機會頗高。反而睇餸食飯，準備九、十月大賣的對手，隨時要調低全年目標，相對弱勢。好似近期彈唔起的雅居樂（03383），頭九個月只完成目標59%，能否到岸仲係未知之數也。

保利置業冷敲之選

除此之外，近日熱錢持續湧向高息企業債，尋日有內房公司發5年期公司債，居然只係6厘水平，半年前諗都無諗過！儘管樓市短期展望一般，但融資成本咁低，對重債內房點都有幫助。何況估計內房股股價，也已經反映未來幾個月，不抱厚望的銷售數據，現階段入市，值博率應該高於坐艇風險。

如果嫌上述幾隻龍頭太重磅，冷門心水係保利系的保利置業（00119），其首三季完成銷售172億元人民幣，已超越舊預測的160億人民幣，即使公司已上調目標去到190億人民幣，但超標機會仲係好高。過去因其高負債比率（六月時1.15倍），令折讓高於同業平均，刻下情況應該相對有利，短期升穿七月阻力位4.88元，有機會出現較大突破。