股海實戰：瑞年有勢再展升浪

尋日港股反彈，恒指收報21,641點，升213點，成交480億元。眨吓眼又安然度過傳統股災月。今年十一月嘅特別之處，係中、美兩國政府都有變動，阿莊估計此前魚缸表現會維持反覆偏好，之後就有機會出現調整，即係話十一月市況可能係先升後回。

內地人消費能力與日俱增，有錢自然識得錫身，健康產品市場嘅發展潛力龐大。主營銷售營養保健品、保健飲品及藥品嘅瑞年（02010），過去三個財政年度盈利每年都實現雙位數字增長，今年上半年賺2.95億元人仔，同比增14%。老實講，阿莊都未曾用過瑞年嘅產品，但睇見早幾個月李超人旗下嘅長江生科（00775）增持瑞年股權至超過5%，成為主要股東，就對呢隻股另眼相看！

憧憬長科再增持

睇番份中績，整體毛利率有72.3%，反映呢門生意利錢可觀。旗下嘅保健營養產品喺內地約6.3萬個零售點發售，飲料產品喺全國超過20萬個零售點銷售，醫藥產品則銷往全國逾300家醫院，而專營直銷店數目亦不斷增加，龐大嘅銷售網絡係呢隻股嘅強項之一。阿莊估計，日後瑞年有機會與同樣經營保健產品業務嘅長科有業務合作，又或者獲長科再增持股權。

再睇瑞年股價，次季成功考驗1.6元水平支持下重展升浪，本月初重上250日線，50日線亦有勢升穿250日線，上周四股價見2.89元後回吐，本周初回落至2.6元水平現承接，尋日反彈4%，收報2.77元，短線完成調整再次起動嘅話，下一阻力區喺3至3.2元，不跌穿2.45元可繼續持有。

呢期唔少靜咗好耐嘅股仔起動，如華藝（00559），一係唔升，一行就五、六成。尋日睇股權披露，留意到隻事安（00378），前日有22球貨（每股作價0.87元）以交叉盤上板，原來係來自控股股東中信國際資產管理，接貨嘅係中國節能環保集團。

呢隻股長期成交低迷，但勝在最終母公司喺中信集團，依家引入據講總資產接近600億人仔嘅央企中國節能環保集團做主要股東，唔排除有大Project跟尾，可以關注。