樓市出更：廿億舖買定等辣招

政府上周五出招調控住宅炒風，其實好多人之前已經索到燶味，唔少投資者已搶先入市工商舖，驚辣招燒埋佢哋，好似投資者尹柏權用19.8億元買入尖沙咀百樂酒店一批商舖等物業，註冊買賣登記日期就啱啱喺上周五。美聯工商舖（00459）料未來工商舖盤源會減少，相信今季交投量按季跌10至15%。

劉Sir啱啱收到土地註冊處嘅資料，尖沙咀漆咸道南61至65號（即百樂酒店現址），其中7,100多份業權份數以19.8億元登記售出，市場相信有關交易屬商舖部分，而買家董事包括尹柏權，同一間法人團體任董事的公司，睇真啲，簽約當日係上月二十六日政府出招當日，相信尹氏早着先機，大家都揣測，買家以行動證明工商舖後市充滿信心。

舖源減 41%業主話反價

據悉，上址原業主由投資者羅家寶等透過百樂集團持有，早在○三年以逾5億元全幢酒店購入，上個月羅家寶透露，其中商場部分意向價約20億元，與是次成交價脗合。

另基金上月拆售嘅葵涌永得利廣場陸續有成交曝光，睇番土地註冊處資料，上址1座9及10樓，與2座8至22樓其中5層共錄臨時買賣登記5.5億多元，登記日期上月五日，亦喺出招之前。

美聯工商舖尋日就話，新招推出後訪問約671名工商舖業主，有約41%表示會反價，另有16%封盤，令唔少準買家縮沙同觀望，該行行政總裁黃漢成話，雖然呢幾日工商舖物業嘅查詢增加咗約17%，不過實際成交好少，刺激作用唔大，料本季工商舖嘅交投量會按季跌10至15%；至於樓價方面，料商業樓跌4至5%，舖位則會平穩，而受九龍東等概念帶動嘅工貿樓將升約8%。

廠佬回流買工廈收租

佢認為，一旦政府將新招引用到工商舖物業，將出現災難性影響，價錢進一步被推高，屆時成交急跌40至50%。

雖然新招令內地客入市港物業門檻大增，不過，有香港廠佬趁人民幣升值，套現部分內地資產，返港買工廈收租投資。有代理話，上個月九龍東工廈物業買家中，同時喺內地有廠房嘅比例，升到大約20%，按月多咗約10個百分點。