股海實戰：統一睇位分注上車

港股上周五結束十連揚，恒指收市報21,545點，跌264點，成交552億元，主要受A股跌勢拖累。對於A股轉弱，其中一個說法係有數據顯示，內地基金公司第三季投資重傷，唔排除嚟緊會有較大規模嘅贖回潮出現，為A股添沽壓。之不過，睇上周五A股成交又唔係特別多，暫且看待成正常調整，畢竟阿莊仍傾向相信，十八大前內地維穩至上，各環節出亂子機會唔大。

恒指十連揚最多升咗900多點，但期間外圍連番低收，相比之下港股算係強勢。技術上，短線守住21,200至21,300點水平，仍可視為正常調整。雖然上周四、五唔少中資股板塊現較大回吐，但別忘記國企指數由九月低位累計反彈接近兩成，調整係好正常，守穩250日線10,237點，毋須過於悲觀。再者，特區政府上周五再次針對樓市炒風出手，短期地產股氣燄肯定要謝一謝，留港熱錢選擇唔多，唔排除跌到咁上下又會翻兜中資股。

基金沽聯通買中移

上周提過隻聯通（00762），首三季數據唔錯，但齋睇第三季就略遜預期，基金不留情面沽之哉，上周五股價以全日低位12.72元收市，跌幅7.56%，真係令人失望。睇番大行報告，雖然普遍認為季績無甚驚喜，但亦不至於太負面，何解會引發咁大沽壓？諗來諗去，記得上周提過中移（00941）第三季業績勝預期，唔排除部分持有電訊股嘅基金，睇完聯通份報告之後，增持中移減持聯通。

繼續睇業績股，統一（00220）公布首九個月純利1.27億美元（折合約7.9億人仔），係今年以來表現最好嘅一季，對比期間內地經濟增長明顯放緩，更顯其季度成績標青。據美銀美林嘅調查估計，季內統一受惠旗下方便麵及飲品銷情理想，並料末季收入可實現25%增長，加上原材料成本下降，料一二年純利可達到9.76億人仔。以上周五收市價9.66元計，一二及一三年度預測市盈率分別為29倍及21倍，估值雖非十分便宜，但仍有想像空間。若然嚟緊市況配合，季內股價可反覆向10.5至11元推進，建議待回吐喺9.3至9.55元水平分注上車，跌穿上月低位8.92元止蝕。

順帶一提，上周買入短炒嘅中傳動（00658）跌5%，收報2.62元，短線若未能重上10日線2.71元樓上，會考慮先行沽出。