樓市出更：兩幅限量地出價難勇猛

將軍澳第66D2區及沙田馬鞍山落禾沙彩沙街兩幅限量地喺今個禮拜五截標，咁啱政府再出「辣招」，不過有測量師老友就覺得對發展商投地意欲影響有限，但出價可能會審慎啲。其中上個月投得毗鄰將軍澳第66C2區限量地嘅信置（00083）等，同埋烏溪沙新盤大賣嘅恒地（00012），劉Sir都估計幾大機會入標，而兩幅地皮最高估值維持約54.6億元。

將軍澳南近年先後有多幅限量住宅地皮批出，當中以上個月信置同嘉華國際（00173）合組財團奪得嘅將軍澳第66C2區臨海限量地最好價，每方呎成交樓面地價去到約4,696元，創咗區內歷來賣地呎價新高，劉Sir發現，今次截標嘅66D2區臨海地皮喺隔籬，相信兩家財團有機會出價競投。

將軍澳地皮臨海有優勢

正正因為第66C2區以區內高價批出，所以劉Sir部分測量師老友亦先後調升第66D2區臨海限量地估值，好似高緯環球張翹楚同中原測量師行張競達，都將地皮樓面地價由原先估計嘅4,500元，調升約4.4%至4,700元，估值約26.5億元，係市場上限價。

適逢政府上周又再出招，暫時測量界指都要睇睇影響有幾大。高緯環球張翹楚就話，出招對發展商投地意欲影響唔會太大，但相信部分財團出價會略較原先保守，但強調一手新盤有剛性需求，所以暫時未調整估值。

落禾沙平均每伙千二呎

至於自早年馬鐵通車以來，烏溪沙一帶住宅發展亦逐漸成型，好似早年信置烏溪沙站銀湖．天峰，以至近期恒地迎海，售樓銷情都認真唔錯，就算即將截標嘅落禾沙地皮須作限量發展，但計番每個單位平均面積仍可高逾1,200方呎，對發展商而言梗係有吸引力啦。而市場估值最高約28.1億元，樓面地價約5,000元。

事實上，政府上季主動推出勾地表入面6幅地皮，就以上述將軍澳及落禾沙限量地最具規模，好似將軍澳限量地可建樓面就有約56.3萬方呎，單位數目限制為不少於600伙及不多於630伙。

至於落禾沙限量地總樓面都有約56.2萬方呎，伙數不少於440伙及不多於463伙。劉Sir計落兩幅限量地提供單位數目加埋最少都有1,040伙，即係佔咗上季主動推出6幅地1,800伙嘅約57.8%之多。