股海實戰：大成跟炒咪大貪

港股一如預期隨外圍走高，但又係一步到位，即市跟進水位唔多嗰隻升市。除咗煤炭股同個別民企股外，連不斷有負面消息傳出嘅汽車股、積弱甚深嘅體育用品股，同受歐洲經濟拖累嘅思捷（00330），尋日都有好表現。咁嘅現象，也許說明缸邊友押注大戶呢鋪會繼續挾高盡殲熊仔，但又要提防音樂遊戲音樂一旦停止，重磅股會率先掉頭回落，故將焦點轉移至落後板塊。

見到電股跌煤股升趨勢明顯，可以𥄫實其他周期性股份。阿莊尋日亦湊熱鬧，落場以均價每股9.69元買入一萬股海通證券（06837）。回說尋日升市，本地地產股功不可沒，其中信置（00083）升近半成。

美聯下一站睇4.8元

事緣新一屆政府登場後，至今未見有打擊樓市炒風措施，至於話活化居屋市場同增加土地供應，一句講晒係遠水難救近火。炒家睇準喺明年一月施政報告發表前樓市都冇大跌之虞，紛紛落場試水溫，連帶地產股亦撥開雲霧。近日有地產代理向員工發花紅，顯示代理業生意唔差，美聯（01200）股價50日線有勢抽穿250日線，有望繼續追落後，下站阻力喺4.8元，支持位喺4.16元。

股仔方面，上周提及嘅第一視頻（00082）回吐壓力唔大，公司係咪趁有消息又諗抽水就不得而知。玉米加工股亦有異動，尋日見大成生化（00809）急抽8.6%至1.01元收市，成交1,962萬元。上月初大成發盈警，表示喺玉米成本增加下，預計截至六月底止嘅中期業績同比下降，盈警消息影響股價失守1元關，至下旬公司聯席主席入場增持股份，本月初低見0.87元始止跌，尋日1元關失而復得。

六月美國旱災，糧食產量下跌引發糧價上漲，吸引游資炒作，玉米、大豆同小麥價格急升，其中玉米價格喺過去兩個月累升逾五成，並創歷史新高。玉米價格上升，照計不利玉米加工商，皆因主要原材料價格上升，將拖低毛利率，即使公司有能力調高出產價格，將升幅轉嫁客戶，但調價須時進行。喺咁嘅背景之下，為何尋日大成股價照升可也，倒令阿莊感奇怪。今日內地將公布CPI數據，市場預計同比增幅可能落到1.7%，係咪預先炒定內地通脹低企，即使糧價回升並不能左右中央救市決策，抑或炒定玉米價格將見頂，就要做事後孔明。講番大成股價，暫只能以反彈浪視之，50日線1.12元乃主要阻力位，10日線支持喺0.93元，跟炒要睇餸食飯，唔好大貪！