樓市出更：樓市旺番代理攞牌即飆

近排樓市交投又旺番，加上進入暑期旺季，代理生意可望可以好番。睇番地產代理監管局（下稱地監局）嘅數字，入行攞牌人數回升，剛剛公布截至七月底嘅數字，依家持牌代理人數按月回升0.9%，升幅係今年二月後最好，更首次突破3.5萬人次，再創歷史新高。

地監局同劉Sir講，去到七月尾持牌代理人數有35,156人，按月升幅0.9%，同今年二月升幅達1.1%比較，僅相差0.2個百分點，其中擁有可以開舖做主管嘅大牌人數，七月份有15,705人，比六月同期多220幾人，按月升幅1.4%；而營業員牌照人數就有19,451人，按月只微升0.4%，反映開舖代理人數增幅最明顯。

事實上，本港第二季嘅樓市表現不俗，利嘉閣掌舵人廖偉強（Willy）同劉Sir講，佢哋會向公司後勤員工發放相等於一個月嘅人工做花紅，而近排二手交投旺番，加上預期呢季有兩個大型新盤有機會登場，所以預期第三季生意會比上兩季好好多，後勤員工嘅花紅，相信亦可以按表現提升。

同系嘅中原地產亦宣布，第二季錄得達8.97億元嘅業績，同首季差唔多，所以會向後勤員工發放相等於不少於一個月嘅花紅；後勤管理層就有相等於超過1.6個月嘅季度花紅；而上半年後勤員工獲發花紅由差唔多2.2個月至超過3.2個月不等。

二手交投連升五周

至於股市向好同新政府嘅激活居屋政策下，刺激50屋苑上周錄得391宗二手樓宇買賣個案，不但按周勁升15%，更連續五周錄得上升，其中三周成交量更加超過300宗，創近二十一個星期新高，其中鰂魚涌太古城嘅成交量，由前周2宗勁升7.5倍至17宗；而九龍灣德福花園由七月下旬1宗成交，急增至上周7宗，成交量升幅達6倍；另整體樓價就微升咗0.3%。