股海實戰：電訊股買貨諗得過

本港昨日凌晨掛起十號波，深宵回家人士經歷了一場「生死鬥」，直至昨日中午，市面才逐漸恢復正常。環球投資市場本周以來同樣受盡風暴蹂躪，周一大挫近600點後的港股，昨日午後復市，縱有內地人行進行950億元人民幣逆回購、向市場注入流動性，以及滙豐中國七月份製造業PMI初值創五個月新高等利好消息，但恒指升回水面的時間僅屬曇花一現，泰山壓頂的沽壓終令萬九關不保，最低挫至18,854點，收報18,903點，跌150點，半日市成交接近300億。

內地經濟仍未樂觀

雖然滙豐PMI初值仍低於50，代表製造業活動處於萎縮，但數值較六月份終值的48.2高出1.3個百分點，始終是好事。有人認為內地經濟已於第二季見底，好友聽到此番言論，當然心生歡喜。不過，今浪由歐債危機所引發的骨牌效應既深且遠，連歐洲強國德國評級展望亦下調至負面，就算下半年內地一如預期的加快放水步伐，大家都唔好以為一天光晒。

美元強、需求減，油價再挫之際，中海油（00883）公布，以全現金收購加拿大上市的能源公司尼克森，按每股27.5美元價格，足較上周五收市價有61%溢價，咁貴都出手，一般人當然摸不着頭腦，但多間大行出來力撐，其中麥格理話作價雖偏高，但絕非愚蠢。大摩同瑞信就長線睇好。不過講多無謂，行動最實際的股價反應，告訴你市場唔多LIKE，中海油股價昨跌4%，是跌得最多的成分股。

市場繼續風雨飄搖，內地電訊股成為了定海神針，中移（00941）收復10日線，升0.8%，聯通（00762）靠穩，中電信（00728）因其北京門市75折賣iPhone4S，股價受刺激升近2%，升穿3.75元阻力，全個板塊齊齊逆市向上。

電訊板塊早輪受減價戰及個別月份上客遜色的影響，股價連番下跌，聯通淪為上半年表現最差成分股，中電信亦跌到七個一皮，得中移叫做撐得吓。不過，周期升跌對電訊需求影響相對輕微，德銀睇好此板塊，給予聯通買入評級，估計下個月公布的中期業績有24%增長，中移增長預期就有3.8%，第二季增長勝首季，可續持有。只要資本開支及手機補貼控制得宜，在一片盈警聲中，投資電訊股的確是比較靠譜。