樓市出更：九七蟹貨報喜上季多17%

今年各區物業陸續攀上高峰，歷劫風浪嘅「九七蟹貨」業主亦返「家鄉」；繼今年首季後，第二季九七蟹貨「鬆綁」登記按季再增約17%至219宗，涉及金額增約12%去到約10.66億元，其中港島區「鬆綁」個案佔116宗最多。

利嘉閣地產研究部主管周滿傑同劉Sir講，今年樓價成功突破九七年頂峰，唔少當年摸頂入市嘅業主終於收復失地賺錢離場，上季本港共錄到219宗九七蟹貨「鬆綁」登記，比起第一季多咗約17%，宗數連升兩季，累積升幅達約92.1%。

碧蕙園超九七價逾倍

港島區一向都係升市「火車頭」，所以上季錄得嘅「鬆綁」個案佔116宗最多，佔整體同類登記多達約53%；而九龍及新界就分別有56宗及47宗同類登記。

由於樓價升得快，所以呢班九七業主「鬆綁」賺錢幅度都愈來愈大，個別仲大賺特賺，劉Sir發現，上季十大蟹貨「鬆綁」賺錢個案當中，就有9宗係港島成交，全部都係過千萬元嘅豪宅成交。其中以東半山碧蕙園B座低層A室「最威」，上季以4,000萬元登記售出，比起九七年購入價足足高出2,200萬元，升值高達約1.22倍。

賺錢登記今季料增15%

再按小區劃分，上季嘅「贏家」都係屬於港島區，期內排頭五名嘅分區都係位於港島，好似錄得最多蟹貨鬆綁個案係堅尼地城 / 西營盤，就有19宗同類賺錢登記，其次跑馬地 / 大坑、筲箕灣 / 柴灣，以及西半山等，就錄得介乎11至15宗同類登記。

睇番最近市場高價成交湧現，所以周滿傑都預期，樓價保持強勁升勢，九七業主「鬆綁」嘅機會都隨之增加，相信今季「九七賺錢貨」登記數字會進一步攀升，預期較上季再增約15%至250宗水平。