Fundman睇市:買國壽博挾死淡友

持續多日的低成交,令人以為聯儲局主席伯南克發表中期貨幣政策報告前,股市會水盡鵝飛,不過升市唔等人,尋日早市期指出現十五分鐘挾高近300點的奇景,淡友居然死於平日鮮有炒家留意的澳洲儲備銀行(RBA)政策會議文件內容,確係死唔眼閉。

RBA公布七月政策會議紀錄顯示經歷五、六月兩次減息後,委員認為暫時沒有進一步減息的需要,同市場估計繼續減息有出入,曲線話畀大家聽,中國對鐵礦石及煤炭的需求無想像中咁疲弱,澳洲及中國經濟比市場預期樂觀,加埋人民銀行再次逆回購,短期減息的憧憬升溫。經過連環放水,近期人民幣息口回落幅度唔細,一個月拆息由高位4.8厘回落至尋日3.12厘,見一個月低位,淡友受到教訓,大市挾高後橫行,收市升333點,報19,455點。

一個月內兩次減息,內地資金供應近日有迹象由緊轉鬆,剛跌至半年新低的A股,史提芬深信已開始有留意必要。過去散戶直接投資A股門路唔多,揀來揀去都係A50(02823)、標智滬深(02827)等,不過尋日開始多個選擇,首隻A股ETF華廈滬深三百(83188)登場,老友分析話佢有兩大好處,相當啱「斤斤計較」的股民,一是管理費暫時是眾多指數基金之中最低,其次所持有股票由ETF信託基金管理,唔似雷曼迷債咁有counterparty風險。

券商與壽險股也是曲線之選,近半年營運數據一直跑輸同業的國壽(02628),六月保費收入314億元人民幣,按年升8.3%,與五月比較更大升49.5%。由於過去幾個月營運數據麻麻,五月開始國壽累積唔少沽空,尋日股價升至21.65元,剛好搭住五月初及七月初兩次反彈高位21.65元及21.75元,一旦突破,淡友勢必投降,不妨留意。

全球央行輪流放水,前晚美國十年期債息創超過兩世紀新低,連facebook創辦人朱克伯格,都將加州間豪宅攞去按,30年浮息做到1.05厘。筆者多次提過,超低息形同縱容借貸,懲罰儲蓄,資產價格受到刺激下,對有錢人身家的提升作用,肯定大過一窮二白的普羅打工仔。一葉知秋,你睇坐擁200億美元身家的朱生都玩按樓套現,唔通等錢使咩!

新地壞消息出盡

香港資產價格處於回歸後高位,但地產股卻遠遠落後樓價。近日,新特首房屋政策陸續曝光,股市對樓市被推倒明顯過慮,筆者深信地產股在未來半年至一年內,跑贏大市機會相當大。新地(00016)管理層正式被起訴,這類全港頂尖律師食大餐的訴訟,戰線拖三兩年唔出奇,高層出事後,新地比長實(00001)跑輸11%,比恒地(00012)跑輸17%。但在地產股追落後及壞消息出盡之下,新地有條件收復失地,繼續是筆者中短期最看好股票之一。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

史提芬