股海實戰：華創20元樓下收集

魚缸消息好壞參半，最新嘅澳洲聯儲會議紀錄比市場預期樂觀，好友乘機挾淡倉，恒指尋日反彈三百多點，但指數升勢難掩近日盈警消息對中企所造成嘅沽壓，如尋日建議唔好撈底嘅TCL通訊（02618）再跌逾一成；今年業績難樂觀嘅國美電器（00493）得番0.91元；受累車市銷售前景未明嘅中升（00881）急插12%；遭大行唱淡嘅山水水泥（00691）跌一成；百貨股茂業（00848）連日急挫，尋日再插13%。總而言之，呢期買股票要贏錢難，要唔輸錢更加難！

A股尋日回穩，內險股表現算係唔錯，前日推介嘅國壽（02628）上半年計原保險保費收入按年跌5.17%，表現勝於預期，股價做好，曾高見21.8元，收報21.65元，升3.5%。阿莊心思思想先買一注，喺21.3元排隊，可惜冇「中獎」，今日會再睇情況行事。

內險股強 華保獨弱

另外，平保（02318），財險（02328）及太保（02601）升幅介乎1.5至3.5%，但新華保險（01336）獨弱，跌5.7%，皆因其六月份保費收入增長乃同業中表現最差。不過，睇瑞信嘅報告話，隨着最近人行兩次減息，料對保費收入影響正面，故維持給予該股跑贏大市評級，目標價睇38.5元。基於眼前走勢確實轉弱，建議先觀察27元水平承接再謀定而後動。

上半年內地經濟增長放緩超乎市場預期，內需股身價亦大減。不過，隨着人行兩次減息，已確定銀根將由緊變鬆，若今日國務院會議定調下半年加大力度提振經濟，實力內需股毋須過分看淡。

主營啤酒、零售、食品及飲品業務嘅華創（00291），股價自今年三月高位30.8元回落至尋日低位見20.6元，累計跌幅達33%，相信已反映經濟增長放緩對主營業務的影響。

華創截至三月底止每股NAV為16.34元，手持淨現金，有能力維持相對穩定嘅派息。即使保守假設今年純利倒退一成，現價預測市盈率已回落至不足20倍。論估值，相信股價喺18至20元會有較大支持。再睇技術走勢，近月14日RSI明顯出現背馳，相信目前估值距離年內低點不遠。睇好末季內地消費市道，喺20元樓下可考慮分注收集華創，反彈較大阻力位24至25元區域。