樓市出更：甲廈租金成本 港貴絕

香港作為國際金融中心，寫字樓租金成本亦係全球最貴。劉Sir參考世邦魏理仕調查報告，截至今年三月底，香港中環整體商廈租金成本每月每方呎高達約161.7元，冠絕全球，比起第二位嘅英國倫敦西岸約143.1 元大幅高出約13%；但受環球經濟不穩影響，拖累租金走勢，令中環租金亦是眾市場中跌幅最大，按年大跌達17.2%。

本港寫字樓租金成本一向出名貴，尤其係供應緊絀商業核心區，劉Sir睇過世邦魏理仕半年一度嘅《主要寫字樓租金成本》報告，呢份報告足足調查咗全球133個市場，足以進一步引證中環係全球寫字樓租金成本最貴嘅地方，平均每月每方呎約161.7元，拋離第二位嘅英國倫敦西岸多達約13%。至於排名第三嘅日本東京，每月每方呎租金成本則大約121.2元。

經濟蒙憂 港租金挫17%最巨

世邦魏理仕簡儒德同劉Sir講，香港排名全球最高，反映本港寫字樓供應不足情況，亦凸顯本港係全球寫字樓承租者首選地方。而九龍西租金成本亦躋身全球第七位，每月每方呎錄約103.2元，但受環球經濟前景不明朗影響，本地甲廈租金按年大跌達17.2%，為眾市場中跌幅最大。

至於近年經濟發展迅速嘅內地市場，寫字樓租金成本亦「一日千里」，劉Sir發現，北京建國門核心區平均每月每方呎嘅租金成本報約117.5元，排名雖只屬全球第四高，之不過講到升幅就真係一枝獨秀，租金成本按年上升約49.4%最多，睇番原來升幅第二位及三位都屬於內地市場，分別係北京金融街同埋廣州，按年升幅達約42%及40.4%。

宏觀啲睇，有關資料顯示，全球寫字樓租金成本平均按年增長約3.6%，其中以亞太區表現最突出，期內錄得約7.8%增長，其次美洲則錄約5%升幅。事實上，頭50大租金最貴城市當中，亞太區就佔咗19席之多。