投資SUN角度：恐慌升溫絕境可逢生？

老外順口溜話Sell in May go away，本地股壇都有句：「五窮六絕七翻身」，對於環球投資者，今年五月確實難捱，一個希臘爛仔賴數，全球金融市場翻天覆地，被譽為基金提款機的港股，跌得更見誇張，踏入五月至今只有四日不跌，上周三（23日）沽空佔大市成交比例，創下十三年新高，大孖沙要錢唔要貨，恐慌情緒媲美去年第三季的歐債危機。

希債主導投資情緒

年初股市仲係一面樂觀，市場深信歐洲央行兩輪長期再融資操作（LTRO）變相放水，已足以把歐豬國家融資困難問題平息，八成港股基金一、二月表現遜於大市，於三、四月紛紛追貨，殊不知，隨着法國總統大選變天，抗拒緊縮的左翼勢力抬頭，歐盟領袖德、法兩國話事人，由要求歐元成員謹守財政紀律的默科齊配，換上為發行共同債券，貌合神離的默朗德配，五月的股市氣氛急轉直下，其後，希臘國會選舉需要六月重選，證明共富貴易，共閉翳難的事實，支持財政緊縮政黨遭選民背棄。希臘左翼政黨繼續靠嚇，揚言情願脫離歐元區，也不要遵守當日獲得歐盟援助時許下的緊縮承諾，歐元區政局動盪最終點收科，會否一粒老鼠屎搞垮一煲粥？看來股市淡友已經在五月份充分利用市場的不安。

股市無運行既成事實，五窮後會否六絕，投資者要打醒精神，唔少對全球金融市場舉足輕重的事件將會於六月發生，十七日希臘國會重選肯定是當中焦點，反抗財政緊縮的左翼政黨，一旦取得國會過半數議席，希臘脫離歐元的機會，勢必升溫。近期，唔少大行都同希臘計計數，瑞信分析師預期，假如希臘選擇脫離歐元區，會令歐盟年內GDP減少3.5%，希臘重用本身貨幣，首年好可能會貶值50%，國內通脹飆升至20%以上，GDP至少下跌10%。

俗語話危中有機，恒指跌至19,000點樓下，唔少證券商開始為港股站台，高呼抵買。大摩剛舉行《第三屆香港投資者會議》上，亞洲及新興市場股票策略部主管郭強盛（Jonathan Garner）就以恒指歷史股息率，已升至接近4厘的超賣水平，預測未來六至十二個月內，恒指有機會升至23,600點的目標水平。

各項歷史估值比較，港股目前再跌空間或者唔多，恒指成分股的平均市盈率十倍，比十年平均14.4倍，低出接近三成，如果外圍政局轉穩，經濟好轉，港股應有不俗上升潛力。過去二十年恒指市帳率的高低區間介乎一至三倍之間，一倍的極端低殘估值，只曾經在九八年亞洲金融風暴及○七年的美國次按危機出現，除非是堅信希臘六月中選擇會引發「廿年兩遇」的金融危機，否則看官大可等等，不過隨着上星期歐盟非正式峰會上，歐盟成員放風研究發行共同債券，再以大規模放水救市，藉六月份市場不安情緒達到高峰，可能正係另一次入市黃金機會。