魚缸Blogger：匯銀家電有力再彈
淡馬錫突然宣布折讓配售手上嘅建行（00939）同中行（03988）股份，不過魚缸並無被拖冧，尋日埋單計只係跌59點，可見市底甚強，個市應該仲可以玩多陣。
國美（00493）暴跌兩日後，尋日終於有反彈，但升幅相對其他家電股就失色得多，至於板塊炒上原因，有解讀認為係作為內需嘅重要一環，阿爺應該唔會對水深火熱嘅家電行業置之不理，並憧憬好快會有刺激農村消費嘅措施出台，講到呢度就即時令暴炒男諗起匯銀家電（01280），雖然屬績差股，但匯銀嘅農村銷售網絡強勁，擁有逾200家門店，而股價喺二月高見0.94元後，要累跌六成至上市低位0.385元先喘定，就算尋日報復性反彈番兩成，股價仍相當低殘，加上有國策扶持，計落應可再彈，阻力睇0.55元。
匯銀家電（01280）
阻力位：0.55元
支持位：0.45元