牛熊對壘：支持好友買恒牛61574

過去兩個交易日，港股累升568點，昨在外圍數據欠佳及兩大內銀被淡馬錫配股的消息夾擊下，開市唔見一舊，全日高低波幅奀到極，只有103點，主板成交表面上有733億元，扣埋配股上板部分後實際跟周三情況相若。

中行輪證成交大增

淡馬錫早前才從高盛手上接過工行（01398）批貨，用咗25億美元，依家又甩掉手上的建行（00939）及中行（03988），套現唔夠200億元，一出一入手上持貨價值唔差好遠，但建行及工行就成為昨日跌得最多的內銀，均跌逾3%，市值加埋無咗542億元，影響有幾大唔使多講。

兩隻股份的相關輪證表現個別，平時人氣一般的中行輪證突然旺到飛起，單日成交急增五倍，錄得2.4億元。建行輪證成交4.8億元，按日增七成，共有四隻建行及中行認沽輪打入十大升幅榜，但有個別券商話資金乘機流入相關認購證博反彈。

大行唱好醜股翻身

滬綜指收市回升1點，恒指收市時跌幅收窄至59點，即市無波幅，牛熊證成交只能持平，跟周三成交差唔多，只有58.72億元，窩輪成交按日升9%至64.6億元，繼續牛皮格局。

撇除除息因素後的五月期指略低水3點，周三的現金流反映好淡角力持續，大家對後市無一面倒睇法。在恒指累升逾500點下，周三流入恒指認購及牛證好倉有2,910萬元，淡倉流入量達6,706萬元，淡倉資金流稍多，但好倉仍見有錢入，好友欲再下一城。

根據過去內地凡調低印花稅等相關交易費用，對股市帶來的刺激作用有機會延綿幾日，法國及希臘的選舉又在周末時才有定案，在未有太多負面消息下，今日不妨企埋好友嗰邊。有大行出報告唱好內房股，市場似又再炒醜股翻身的動作。有同感的投資者可以留意恒指法興牛（61574），今年八月三十日到期，收回點數20,400點，槓桿比率二十三倍。