追星族：中國財險穩步回升

內企陸續派發首季成績表，表現可說是榮辱互見，個別股份更見光死，單日可以急挫逾一成。中國財險（02328）首季保費收入則出乎意料地好，加上阿爺出招救A股帶挈，不妨吼位買入。

繼中國證監會宣布研究減交易費後，社保基金亦表示會加強養老保險制度覆蓋，帶動內險股昨日逆市開車。講番財險，市場原先幾睇淡今年產險保單表現，加埋A股表現不濟，點知公司公布首季原保費收入按年錄得逾一成升幅，令不少分析員大跌眼鏡。若單計三月份，原保費收入更按月升逾六成。業績公布後，野村同瑞信都齊齊發表報告唱好財險，主要係睇好產險行業中期前景，分別給予「買入」及「跑贏大市」評級。

經過一個月調整後，該股上月十二日跌至8.74元見支持，逐漸由低位回升，近日重上10元關，昨日高見10.28元，收報10.24元，升3.02%，企穩在多條移動平均線樓上，若成交配合，可上試11.3元阻力。

中國財險（02328）

阻力位：11.3元

支持位：9.5元