股海實戰：海爾長揸短炒皆宜

國際炒家短炒內銀舉動引發港股回吐，惟內地A股撐得住，加上中移（00941）同內險股做好，恒指尾市跌幅收窄，埋單只跌59點，報21,249點，扣除配股上板股份，成交額冇大變化。阿莊買入短炒嘅廣藥（00874）係威係勢，尋日升到上高位見8.67元，遂以8.55元沽出三萬股，袋袋平安！

去年底家電「以舊換新」政策如期結束，但面對經濟增長放緩壓力較大，相關部門不得不改變初衷，除了今年繼續實施家電下鄉外，亦會出台「以舊換新」後續政策，但重點除了顧及消費者外，亦會就家電回收方面進行補貼，並重點推動高能效家電產品消費。

以舊換新再安哥

事實上，去年底空調節能惠民補貼、家電下鄉及以舊換新政策退出，行業銷售出現先高後低嘅格局，企業患上「補貼依賴症」，今年首季銷情慘淡，相信剛過去嘅消費促進月幫助亦唔太大。時值五月初，炒家睇準機會，預先炒定下月家電新政策出台，亦非毫無道理。

尋日海爾（01169）及創維（00751）分別升5及6%，而兩隻細價股匯銀家電（01280）及志高（00449），升幅更達20及11%。細價股明顯較合炒家嘴形，但當然風險亦較高，特別係首季行業淡風對中小型家電商嘅打擊尤大。若然真係睇好新政策出台將惠及行業發展，阿莊寧選龍頭股。

從產品創新及市場競爭嘅角度出發，阿莊認為專造洗衣機同熱水器嘅海爾更具可塑性，特別係洗衣機市場產品結構向滾筒及全自動嘅轉化趨勢明顯，行業競爭逐步向中高端產品集中，市場份額歸向大型業者；而目前三四級城市嘅熱水器滲透率還不到三成，未來增長空間亦較大。至於針對節能趨勢，太陽能、空氣能等熱水器新品種亦有望成新嘅增長點。

此外，近年海爾喺經營現金流、應收帳期及存貨方面嘅成績理想，且已制訂長遠政策，配合市場競爭由打價格戰轉向發掘用戶價值嘅新方向，而透過收購電子商城，亦有助推動傳統商店與虛擬渠道嘅融合，整體布局較優勝。故無論短炒抑或長揸，海爾仍屬板塊首選。

Tip股我至Top

阿莊 4/30 Tip廣州藥業（00874）最多升17%

積奇 4/23 Tip盈德氣體（02168）最多升8%