樓市出更：波斯富街舖七年賺8億

銅鑼灣核心零售區舖位買少見少，唔少投資者都開始喺附近搵舖，為免走寶，出手都好勇，好似日前啱啱招標嘅波斯富街108至120號地下A及B號舖與樓上部分，尋日就已經以11.5億元截標前售出，以單一舖位買賣計，相信係歷來最大宗；個舖原業主揸咗大約七年，帳面勁賺大約8億元，賺幅差唔多2.3倍。

近幾年財團已睇好銅鑼灣零售業後市，斥巨資掃入羅素街等多個一線地舖，加上希慎廣場就快開幕，唔少投資者都睇好該地段附近舖位具升值潛力，若然睇中嘅話，都願意一擲千金奪取所愛。

上面提到嘅波斯富街108至120號寶榮大樓地下A及B號舖、1及2樓及12樓S室及平台巨舖，啱啱喺日前推出招標，劉Sir聽負責嘅中原（工商舖）黃偉基（Raiky）講，個舖未正式招標，已經接到唔少投資者問盤，出價都好進取，所以好快就打動業主割愛。

尋日Raiky已經打電話畀劉Sir，話波斯富街個舖啱啱以11.5億元截標前賣出，佢唔肯透露買家身份。不過，有朋友爆料，話新買家幾年前買過羅素街同埋尖沙咀加連威老道嘅地舖。

利園山道舖漲租1.8倍

上述波斯富街巨舖樓面共約23,932方呎，地舖面積約2,686方呎，大部分樓面係泉章居舊址，喺○五年購入價約3億元，其後業主購入毗鄰舖位，購入成本加加埋埋約莫3.5億元，依家一口氣賣出，帳面賺約8億元，帳面賺幅近2.3倍。

由於銅鑼灣龍頭舖罕有，唔少現租客寧願捱貴啲租，都唔願意搬出，有代理話，利園山道一個依家由金飾珠寶租用嘅地舖，啱啱以每月約200萬元續租，較之前租金升逾1.8倍。

大鴻輝億元掃柴灣舖

另外，近年積極從事物業發展嘅大鴻輝興業，亦啱啱斥資買入港島舖位，其主席梁紹鴻同劉Sir講，斥1億多元購入柴灣連城道4至12號一個低層地下巨舖，涉資近1.02億元，面積大約2.5萬方呎，計劃吸納連鎖品牌租戶，意向月租約近80萬元。

據講，個舖位原業主係中銀香港或有關公司，物業二十四年間升值逾五倍。