股海實戰：信義玻璃追貨未算遲

歐債息率略為回落，外圍股市前晚高收，加上傳出分管財金嘅政治局委員兼副總理王岐山，今日將出席上海金融改革座談會，又話韓國擬於未來數月行使QFII額度買入中國股票，尋日內地股市醒神番啲，帶動港股重上20,700點樓上。今晚西班牙拍十年債，年期較長，結果較具指標性。至於港股，兩萬點仍為主要承接區，但魚缸交投有大改善前，料指數會維持上落市格局，故暫毋須太睇重指數升跌，專心炒個股。

地產股冇運行

近日有大地主評論本港土地政策，似乎在預告七月後香港會大變天。里昂證券最近亦就地產行業發表報告，評級為「減持」，理由係過去十年，相對樓價升勢，地產股回報偏低，而今年七月之後，港府在牛市採取熊市土地供應政策，助長樓價上升嘅不正常情況將會改變，未來五年沒有太大理由持有地產股。阿莊認為其分析中肯，未來收租股表現將勝於地主股，而上周二阿莊推介嘅領匯（00823），尋日創五十二周高30.4元，收報30.3元，升2%。

另阿莊持有嘅昆侖能源（00135）回落至13元邊，短線先觀望50日線13.2元支持，成功重上該線股價可回穩，否則的話可待13元樓下再睇位加注。此外，前日推介嘅中國南車（01766）氣勢如虹，升穿250日線未肯回頭，忍唔住手以均價5.72元買入5萬股短炒，照計呢轉6元應該冇走雞！

尋日留意到另一隻破位嘅基金股係信義玻璃（00868），10日線剛升穿50日線，呈黃金交叉利好訊號，且乃二月中旬以來首次重上5元收市，成交配合。

事實上，公司最近表示，首季玻璃價格回升，毛利率及產量齊創新高，最重要嘅係去年積壓嘅存貨已清理，周轉日數同毛利率都有改善，若然呢個趨勢喺次季持續，可確認業務復甦。再睇其股價，尚處逾半年嘅橫行區內，發力追落後只係時間問題。短線成功企穩5元樓上，追貨有心唔怕遲，下站上望250日線5.58元，支持位喺4.7元水平。

Tip股我至Top

錢進（4/17）Tip TCL多媒體（01070）最多升11%

阿莊（4/17）Tip 中國南車（01766）最多升7%