樓市出更：商廈拆細賣 價更靚

樓市雖然暢旺，但部分銀行對大額商用物業嘅審批依然睇得幾緊，最近唔少發展商同埋業主為咗加快銷情，將大面積嘅全層單位拆細出售，入場費低咗，容易吸客之餘，樓價仲做得好過全層，好似皇上皇集團嘅觀塘寧晉中心高層全層，之前拆咗約10伙，意向呎價約8,100元，比該廈全層放售呎價高約一成。

近期寫字樓全層銷情減慢，唔少業主惟有變陣，將全層單位分間嚟賣，降低每伙入場費。聽講皇上皇集團主席謝炳順嘅寧晉中心高層全層，面積大約23,000多方呎，早前分拆為約10個單位，每個面積縮到大約2,000至6,000方呎，意向平均呎價約8,100元，比起該廈全層呎價高咗約一成。

皇廷廣場全層間十伙

億京發展策劃經理黎裕宗早前話，觀塘皇廷廣場31樓原先全層推售，意向價約9,500多萬元，呎價近7,500元。不過，有代理同劉Sir講，近期有幾個客想買該層部分單位，所以業主決定將全層分間成10伙散賣，每伙面積800方呎起，意向呎價約7,600至8,000元，比全層意向呎價仲高咗5%。

至於港島區，唔少人都話新興商業區有潛力，部分投資者就睇準機會拆售全層，其中黃竹坑One Island South低層全層單位，月前分拆成27伙出售，最細單位面積只係700方呎，最大都係1,600方呎，意向平均呎價約9,500元，比全層單位呎價高約10%。聽講該廈低層全層都諗緊最快下月初拆售，涉及約20伙，面積約1,000方呎起，意向呎價近1萬元。

海港拆細意向呎價2萬

而灣仔海港中心低層全層戶，早前亦都分間成10伙出售，面積由1,300多至9,300方呎不等，意向平均呎價約2萬元，比起該廈全層高約10%，而前排有一個單位曾以呎價近2.3萬元賣出，創該廈新高。

港島寫字樓靚景散位有價有市，聽講灣仔安盛中心有個低層正升降機、全海景單位，啱啱以約2,660萬元賣出，呎價差唔多1.27萬元，創該廈新高。