Fundman睇市：炒業績已成高風險遊戲

歐美股市興奮一日之後，前晚再度腳軟，部分市場人士唔再滿足於聯儲局主席伯南克有關QE3的預告。周二，西班牙拍賣國債籌到25.8億歐元，僅及目標的下限，可見歐洲商業銀行財資部門，從兩輪長期再融資操作（LTRO）借返來的平錢，仲係收埋自保為先。西班牙十年國債，在二月初見過4.85厘之後，近月一直在5厘樓上徘徊。由於歐盟要求更嚴格的財政紀律，以作為救助的條件，在最需要政府使錢去刺激經濟的時候，政府反而要削減開支，市場擔心歐豬經濟將進入惡性循環。

港股反彈同樣短癮非常，恒指尋日跌161點，收20,885點。業績見光死拖累氣氛，國美（00493）洗倉式插兩成一。遠東宏信（03360）、利豐（00494）派完成績表隨即伸手仲要失守批盪價，炒業績變成高風險遊戲。

傳人行減息救市

A股弱勢是另一個拖低港股原因，滬綜指昨日跌至2,284點。而A股今年無疑是全球最差表現股市之一，預期市盈率跌到9.5倍歷史新低。內地股市擺出經濟大有機會硬着陸的姿態，賓架界就流傳，人行短期至少減息一次，以扶持企業渡過難關，最大機會係四月一日官方公布三月份PMI前出招，換句話即係今個周末，堅定流？大家不妨睇睇。

果粉等到頸都長嘅iPhone5，消息話富士康（02038）接到蘋果公司首年八成五生產定單，總共5,700萬部，搞到近日要急急由幾個生產基地附近招工，人數更多達2萬。弔詭的是，消息令富士康母公司鴻海精密，在台灣股價急升至一年高位，年來累積升36%，反觀主角富士康，昨微升3個位，收5.72元，今年升得14.1%，遠遠跑輸畀母公司。

過去幾年經濟大起大落，鴻海維持賺錢能力，富士康卻由○七年高峰年賺7.2億美元，衰到一○年倒輸2.2億美元，史提芬不想多作揣測，但大抵可見市場要乸唔要仔的取向。

記得Steve Jobs過身之前，美國總統奧巴馬問佢，點解唔將iPhone生產遷回美國？當日教主點答，史提芬已唔記得，但要將生產工序遷回人均收入相當高的美國，除非蘋果公司肯投資天文數字的自動化設備，否則可能性是微乎其微。

有一間富士康競爭對手的老闆講過，單係iPhone塊玻璃屏幕，富士康就特別開設一間規模達數千員工的廠房，只負責切割、打磨等重複工序。史提芬深感蘋果公司的厲害，明明彼此是唇亡齒寒的關係，試想如果富士康罷工，短期內根本難以從世界上找到同樣能力替代者，偏偏去年蘋果年賺259億美元創歷史新高，富士康卻只賺得7,284萬美元。

做過廠的，都了解長期接巨額兼利潤低的定單，對單一客戶依賴愈大，固定成本愈高，議價能力愈低。富士康有甚麼辦法扭轉形勢？如果傳聞的接iPhone5新單要招工2萬屬實的話，看來已是不能自拔。