股海實戰：中軟留意買貨時機

港股尋日打回原形，雖然埋單恒指僅跌161點，但民企股卻「血流成河」。沽得咁狠，帶頭沽貨嘅肯定唔係散仔而係基金大戶。阿莊揣測，班基金大戶確認上半年內地經濟將會轉差，由於每逢經濟逆轉，民企所受嘅打擊，遠比有阿爺條大水喉撐住嘅國企紅籌為大，故季結前先行為組合大洗牌，民企股頓成重災區。

前日提及國美電器（00493），話要等埋業績後承接區表現再作打算，結果公布業績遜預期，引發股價大跌逾兩成，收報1.64元，成交高達19.4億元。目前其14日RSI經已落到23，參考去年九月底十月初嘅股價走勢，若短期管理層解畫成功，股價再插多一、兩日或會有技術性反彈，否則的話，即使有國策支持亦難扭轉弱勢。

聯想逆市升有睇頭

反而，尋日提及嘅聯想（00992）表現就幾似樣，股價曾高見7.5元，收報7.31元，逆市升3.6%。講開聯想，尋日見到聯想母公司及微軟分別持股約16%及6%嘅中軟國際（00354）有大手上板，每股作價2.3元，涉及股數五千萬股。中軟收報2.44元，逆市升1.2%。

今年初，中軟宣布重組軟件外包業務為一家新公司，並為新公司引入華為成股東。華為本身係中軟軟件外包業務嘅主要客戶之一，料日後可借助華為嘅優勢向外闖，將軟件外包業務做大做強，為實現喺一五年服務性收入達到百億人民幣嘅戰略目標，邁進一大步。

去年，中軟嘅營業額為22.43億元（人民幣．下同），其中服務性收入為19.59億元，毛利達到7.29億元，毛利率32.5%。要實現一五年嘅戰略目標，即係話嚟緊四年收入平均每年要維持五成增長，高於「十二五」期間行業規劃要求嘅平均增長25%。睇好內地軟件行業，中軟可視為長線佳選。順帶一提，去年底中軟所有已發行A類優先股已獲兌換成普通股，即係話今年業績將不再受相關公允值變動所影響。保守預測公司一二年純利約2.9億元，現價預測PE約十一倍，未來一季可留意買貨時機。

Tip股我至Top

阿May（3/27）Tip申洲國際（02313）最多升10%

暴炒男（3/19）TipYGM貿易（00375）最多升10%