樓市出更：石門工廈鑊氣超強

政府近年推出多幅鄰近馬鐵站嘅石門商貿地，一幅比一幅賣得貴，舊年億京就一口氣用超過15億元連掃兩幅商貿地，反映財團對該區後市充滿信心。有代理同劉Sir講，話近排沙田石門出現罕見嘅投資者入市掃貨博升值情況，刺激做價上升；依家該區工廈平均呎價已突破2,300元，近日區內達利廣場，更有中層單位業主兩日連反兩口價後，仍獲買家追價至逾千萬元承接個案。

唔少投資者都同劉Sir講，石門區內工廈物業未來做價，必定會受多幅商貿地以理想價賣出而被帶動。

石門工廈呎價年升17%

所以近排唔少投資者都响樓價反彈前，轉戰該區供應唔多嘅工廈單位，帶動做價明顯向上。

綜合美聯工商及市場資訊，本月截至本周一，石門工廈物業平均呎價已經去到約2,325元，按月升約半成之外，亦較去年同期呎價約1,977元，上升約17.6%。

好似近日達利廣場一個中層單位，面積約3,140方呎，原業主原先開價每方呎約3,273元，早前獲買家出價洽購，洽購價符合業主意向價，不過拍板前業主反價，買家照樣接受，原業主日前再反價，繼續獲買家首肯，兩日兩度每方呎共反價100元，最終成交呎價約3,373元，涉資約1,059萬元。

達利廣場亦有業主善價而沽，好似一個高層連約單位，面積約1,240方呎，去年底原開價每方呎約3,000元放售，由於近期接獲多個代理查詢出售詳情，因而調高叫價，目前最新意向呎價約3,600元，加幅約20%。

投資者高一成購偉達

另外，亦有投資者高價購入區內偉達中心中層單位，面積約2,980方呎，涉資約778萬元，呎價2,610元，高市價約一成。

美聯黎紹賢同劉Sir講，一向以來發展東九龍區嘅億京，舊年首度開拓石門物業市場，足見該財團睇好石門後市。佢仲話，由於額外印花稅短期內唔會「鬆綁」，估計今年年底前，沙田石門工廈樓價有兩成升幅。