Fundman睇市：雨潤估值未算便宜

中國二月份貿易赤字315億美元，創廿二年最大單月紀錄，歐美經濟弱過藥煲，暫時難以消化內地龐大的產品出口，市場早有心理準備。「十二五」開局之後，中國經濟會逐步由出口主導，轉為推動內需補足，只係多年來慣咗每個月有龐大貿易盈餘，突然大逆轉出現貿易逆差，市場仲係唔多習慣。

中國經濟禁語「貿易逆差」，威力唔及人行暗示放水勁，行長周小川表示內地的高存款準備金率，給予財政政策上足夠空間，可適時適度放水。言論支撐港股重返21,000點樓上，收市升48點，報21,134點，但主板成交得542億元，乃一月中以來最低。

大行力掃中移和黃

收市前缸邊客睇見中移（00941）及和黃（00013）都嘩嘩聲，事關兩隻股份臨收市被大行掃到飛起，尤其和黃，由78元邊掃到80.85元收市，淡靜市況中極為搶眼。投行老友話，有大孖沙對賭和黃場外期權，升勢同冚倉有關，撇開消息，創五十二周新高的中移、和黃及數碼通（00315）等，幾隻高防守性電訊股通通獲大孖沙買起，反而國企指數點都升唔返去250日線11,380點樓上，市底強得嚟，隱隱然有啲唔妥，還望筆者係杞人憂天。聯儲局主席伯南克周三會否為下輪QE放風，對後市發展相當關鍵。

重慶起家的地產商龍湖地產（00960）出成績表，賺63.28億元（人民幣．下同），升53.2%，超出大行預測的37.55億元至55.18億元上限，每股盈利1.23元，派末期息0.175元。三大主要業務包括物業發展、物業投資、物業管理及相關服務，溢利分別升94%、40.5%及58.6%，至87.36億元、3.096億元及8,006.6萬元；期內，合同銷售創歷史新高，達382.7億元，升14.9%，稍低於400億元的目標。

因地產商預售後要等落成交付入帳，內地樓市寒風之影響，今年方見真章。龍湖是業績後伸手熱門之一，去年淨負債率由56.5%回落到43%，一年內到期債務35.8億元及手頭現金145億元，資金壓力應該唔大，問題是中央講明短期唔會放寬打擊炒樓措施，地方政府亦唔可以自己偷步鬆綁，龍湖資產折讓唔算吸引，短期10至11元（港元．下同）上落機會頗大。

曾經愛股雨潤（01068），全年少賺34%，至17.99億元，業績居然比大行預測的13億至16億高，可惜睇咗幾份大行研究報告，都質疑管理層為毛利率急跌的解釋，及生產設備使用率低於五成，下半年仲大肆擴大固定投資，瑞銀更叫客仔沽售，睇6.9元。

出到換人一着，畀投資者耳目一新的意圖相當明顯，但唔少long only基金，對過去幾個月就補貼問題及毛利率災難的解釋感到怕怕，唔少人憧憬雨潤會係李寧（02331）二號，但以市值212億，扣除政府補貼、負商譽及匯兌收益後核心淨利潤10.71億元，估值仲未算好平，況且新管理層要時間重建市場信心，筆者暫時只會在相當極端的情況，例如再見8至10元，才考慮再買雨潤。