股海實戰：中核國際人氣急升

尋日港股大部分時間都係死吓死吓，全靠中移（00941）頂住，下午大笨象（00005）跌幅收窄，加上臨尾市和黃（00013）發力，連帶長實（00001）亦跟住抽高，結果恒指止跌回升，收報21,134點，升48點，但成交只有544億元。

依家個市陰陽怪氣，本來睇成交同技術走勢，投向淡友陣營唔係冇道理，但偏偏有大盤輪流挾高重磅藍籌，搞到唔少炒家都亂晒陣腳，但轉投好友又驚藍燈籠輪流高掛唔係好兆頭，總之好、淡雙方都無所適從！

長和業績前異動

近期除咗中移及和黃，數碼通（00315）以及中興通訊（00763）亦有動靜，係咪正醞釀炒4G概念？阿莊自問唔係呢方面嘅專家，加上睇見3G威力都唔係想像中咁大，故亦不敢妄下判語。若撇除呢方面嘅憧憬，長、和股價異動，料與月底業績有關，近日德銀報告指和黃係綜企股中首選股份，相信業績前大行報告陸續有來。

板塊方面，尋日核電股氣氛唔錯，其中中核國際（02302），高位見3.28元，收報3.22元，升9.9%，成交2,546萬元。老實講，論往績呢隻股冇咩好講，但公司正在轉型當中，去年七月出售壓鑄業務，未來專注從事礦產勘探及經營，目前持有兩個現有鈾項目，分別位於蒙古及尼日爾，均處初步階段，另兼營鈾產品貿易業務，未來公司會尋覓海外鈾資源業務，以及朝鈾產品加工及核能配套產業嘅方向發展。

此外，目前持有中核75%股權嘅大股東係國家發展核科技工業嘅主力軍─中國核工業集團，背景和實力毋庸置疑，相信待圍繞內地核電發展嘅不明朗因素消除，母公司會加快利用中核呢個平台開啟海外業務發展。

股價方面，中核由前年底高位9.55元反覆回落至去年低位1.77元，累跌幅度達81%，去年末季以來股價回穩，上月成交明顯轉趨活躍，昨以大成交上揚，目前250日線喺3.42元，成功站穩其上而人氣維持嘅話，有助確認重納升軌，下一阻力區喺3.8至4元，調整宜守10日線2.9元。

Tip股我至Top

藺俠（3/12）Tip

中移荷合購（15701）

最多升21%

暴炒男（3/9）Tip

歲寶百貨（00312）

最多升9%