新界樓見番九七價
樓價一向落後嘅新界樓,向來同九七價仲有大段距離。但最近部分地區竟出現回到九七場面,例如馬鞍山新港城3期有個高層單位啱啱以高達300萬元賣出,地產代理同劉Sir講,個價已經返到九七年中高位水平。
世紀21奇豐徐永成話,呢排馬鞍山二手盤源短缺,個價就愈上愈高,好似新港城3期R座高層單位,面積只係496方呎,啱啱以一口價300萬元賣咗,呎價去到6,048元,已經返到九七年中高價位。
他又話,新港城3期個價位,從來未試過去番九七價;同屋苑2期D座中層6室,最近都賣咗260萬元,呎價6,404元,係同類單位九七年後新高。
海典居中層賣千一萬
除咗新港城,同區海典居都有突破,好似一個3座中層B室,賣咗成1,100萬元,呎價8,000元,都係屋苑同類歷來第二高。
新界樓價已經愈嚟愈貼九七價。中原陳永強稱,粉嶺花都廣場6座中層D室,啱啱賣咗224萬元,呎價4,333元,創同類屋苑九七年後新高紀錄;同行嘅劉月華講,屯門置樂花園8座高層C室,加完價再被追價5萬元,以195萬元賣出,呎價3,316元,創屋苑九七年後新高。
屯門200萬盤買少見少
祥益汪敦敬指,屯門一向都係上車天堂,但樓價升咗,依家同區200萬以下放盤只剩番少於1,000個。美聯 高文帆就話,屯門站新盤就推出,大興花園已經有兩成業主封盤。有代理爆料,東涌影岸.紅A座一房戶剛剛賣370萬元,呎價6,218元,亦創同類屋苑歷來新高。
至於市區方面。中原王昭康指,鴨脷洲海怡半島9座高層面積931方呎單位,以九七年後同類最高價約888萬元售出,呎價約9,538元。
劉Sir睇番利嘉閣報告,五十個指標屋苑上星期成交量得387宗,按周跌8%,連跌兩周;不過個價再升1.1%,連升三個星期。
馬鞍山新港城本月已錄約18宗二手成交。