短炒倉：華能新能源蓄勢待發

資金繼續板塊炒作，尋日輪到風電股做好，大唐新能源（01798）升5.5%，龍源（00916）升2.3%，但志強早幾日推介嘅中電新能源（00735）就冇升跌，真係激死，不過既然整個板塊開始郁動，相信中電新能源都會跟住行。

講到風電股，仲有隻華能新能源（00958），尋日亦有1.6%進帳。集團屬華能集團旗下，以風電總裝機容量計，為內地第三大風力發電公司，正正就排喺大唐新能源同龍源之後。集團舊年六月掛牌，招股價2.5元，現價1.89元，仍然潛緊水。不過其上市後首份中期業績表現對辦，股東應佔溢利大增1.3倍，至6.73億元（人民幣．下同）。

無可否認，去年內地風電市場呈供過於求，華能新能源亦受影響，上半年集團風電加權平均上網電價由一○年度同期的每千瓦時0.61元下降至0.598元，不過內地一月開始大幅調高可再生能源電價附加費後，情況可望改善，加上華電（01071）系嘅華電福新能源亦計劃第二季來港上市，對風電股估值亦有支持作用。股價過去大半年波幅逐步收窄，料已屆突破邊緣，上望2.2港元，支持位1.8港元。

華能新能源（00958）

阻力位：2.2元

支持位：1.8元