Fundman睇市：味千見底言之尚早

真係唔認錯唔得。上星期安徽省蕪湖市偷步推救樓市措施，筆者當時估計，假如沒有被中央在廿四小時內即時叫停，或者可視為打擊樓市炒賣有放鬆的先兆。估唔到，今次溫總等到七十二小時後先出手，透過內地媒體，重申樓市調控不能鬆，樓價要合理回歸，蕪湖的救市政策也被立即叫停，內房股昨日出現顯著回吐。

溫總的言論多少反映中央有限度微調，仍然沒有把房地產企業及樓市放在考慮之列，佛山被叫停後，蕪湖市政府仲敢「自把自為」的推出補貼救市方案，可見多年來賣地收入豐厚，「使大咗」的地方政府，對樓市鬆綁極為期盼，但現在看來，除非內地樓價顯著下調、未賣出的庫存急升、又或者投資房地產資金明顯減少，才有機會等到這一日。近期資金表錯情，內房股紛紛回升，睇怕只係一次技術反彈，仲未真正轉勢。

新增貸款遠遜預期

一月份，內地新增貸款7,380億元人民幣，同分析員預期的最少1萬億人民幣相比，少了一截，以一月銀行獲得新一年貸款額度，通常特別疏爽的往績比較，唔少估內地年初放水嘅大行，自然係跌晒眼鏡。有趣嘅係，昨A股頂住2,351點不跌，看來市場還是向好的方向去諗，將問題歸咎春節效應，多過實體經濟較預期更差，貸款需求疲弱，咁情況，更加要金晴火眼睇實二、三月份數字，去衡量市場有無錯估形勢。

上周五高台跳水後，昨日港股反彈103點，報20,887點。恒指一逼近250日線，淡友即時磨拳擦掌，沽空佔大市成交比例升至8.93%，見六個交易日以來最高。發盈警後的雨潤（01068），急跌兩成，大行以花旗轉軚轉得最勁，由建議買入變為嗌沽，睇9元。昨提過按雨潤盈警預期的盈利跌幅，下半年幾乎白做，盈利要大跌九成四，博反彈仲係等三月成份業績曝光睇清睇楚先諗。

另一盈警股味千（00538），受豬骨湯底唔夠鈣的消息拖累，估計去年盈利跌20至30%，按此推斷，全年盈利將介乎3.13億至3.58億元之間，但股價反而在8.28元見雙底（一月曾見8.25元）反彈，倒升0.17元收報8.9元。

按彭博資訊統計，大行預測一一年味千業績介乎2.78至5.24億，平均3.38億，盈警預測跌幅剛好在市場估計範圍內，但現股價相當於95.5億市值，一一年市盈率介乎26.6至30.5倍，唔算平，即使大行平均估計一二年盈利反彈到4.63億，等於29.3%至47.9%的復甦，估值仍有20.6倍，同○八年海嘯時的十二倍估值低位比較，更覺得尋日夠膽買的，心口定必有個勇字。

翻查沽空紀錄，去年七月濃縮湯底及顧客被蟲咬的消息傳出後，空軍的確群起出擊，最勁單日試過有7,350萬股沽空，睇番當時空軍的沽空價位介乎13至16.5元，尋日有機會係趁壞消息補倉，股價未必真正見底。考慮主打產品商譽受影響，就算無霸王（01338）咁嚴重，要客仔重拾信心，可能需要一段時間，估值吸引力一般，依家市況又快上快落，不如當睇少隻算數。