股海實戰：國藥繼續挑戰高位

中央再次重申內房調控不放鬆，加埋蕪湖市內房新政被叫停嘅消息，內房股猶如一盆冷水照頭淋，恒大（03333）、雅居樂（03383）和碧桂園（02007）股價同跌逾6%，綠城中國（03900）跌8%。既然緊箍咒搣唔甩，亦惟有繼續抱炒波幅心態，等再回一浸至好諗。

本月初買入嘅和電（00215），終於宣布變相取消無限上網服務計劃，尋日股價創五十二周高位3.6元，收報3.57元，升3.4%。

雨潤已具撈貨價值

雨潤食品（01068）發盈警，料去年度淨利潤下跌38%，尋日開市沽壓有如排山倒海，低位曾見10.7元，收報10.9元，跌幅20%，成交多達17.5億元。

若然去年度淨利潤倒退38%，估計實際淨利潤會降至16.9億元，計落現價市盈率唔到十倍。買股票係講前景，公司喺盈警通告中披露，營運狀況漸趨平穩，有信心業務逐步復恢正常，照計今年呢隻股亦危亦機，加上公司已收歸中糧旗下，唔驚會「冧」，若然短線來多支大陰燭，阿莊真係有啲心動入場執平貨。

阿莊持有嘅金威啤酒（00124），喺傳聞兩大啤酒巨企華創（00291）及青啤（00168）擬競購其啤酒資產下，股價一度高見2.68元，收報2.67元，升6.8%，印證阿莊當日買入呢隻股嘅睇法正確，繼續穩坐釣魚船！

再睇吓異動板塊，醫藥股呢一浪都算硬淨，高位回吐壓力非想像般大，其中國藥（01099）尋日股價創自去年九月底以來高位，收報22.25元，升4%，成交8,667萬元。

國藥主要喺內地從事醫藥分銷業務，國家基本藥物制度實施範圍擴大對其有利。去年首三季，其利潤已超過前年度全年，料去年度業績可報佳音，以市場平均預測其一一年度純利15.3億元人仔計算，現價預測市盈率二十七至二十八倍，論估值唔算好平，但以其銷售規模及受惠國策程度，估值享有溢價亦可接受。圖表上，下一個較大阻力區喺24.5元，支持位20.5元。

Tip股我至Top

Sammi（2/13）Tip巨騰國際（03336）最多升20%

阿莊（2/7）TipMI能源（01555）最多升9%