樓市出更:甲廈「劏」租貴五成

環球股市淡靜,部分衍生產品金融機構生意一落千丈,個別證券行為咗慳錢,突然棄租甲級寫字樓。依家持有中區數十項商用物業嘅紀惠集團,掌舵人之一嘅湯文亮同劉Sir講,佢哋持有嘅金鐘海富中心2座中層全層,一間證券行租用咗兩年左右,早前要求提早一年撤出,最後答應提早解約,但就要罰款200萬元。依家計劃劏做12個單位推出預租,呎租嗌45元,比之前高出五成。

環球經濟走勢撲朔迷離,好多證券行為度過嚴冬,都要諗計降低成本。紀惠集團行政總裁湯文亮話,依家證券生意唔易做,部分賺埋都唔夠畀人工及租金等開支,不過,公司都好體諒佢哋嘅苦況。

好似上述個海富中心2座中層全層,證券行租咗兩年,一向交租都好準時,租約本來喺今年年底先到期,可能近排股市交投持續淡靜,早前佢哋話想提早遷出,傾咗一輪後,公司唔想強人所難,租約可以提早完結,不過就按條款罰租,涉資大約200萬元。

分間12單位 估年中租清

佢仲話,計劃將單位分間成12個單位,每個大約1,200至1,300方呎左右,由於中區優質甲級寫字樓租盤唔多,單位意向呎租睇45元,比之前高出大約五成左右,目前有部分單位,有公司話有興趣,相信今年年中前可以全部租晒。

對於中區寫字樓市況,湯生話市場上部分業主可能想盡快租出單位,所以平少少都肯租。

放盤價進取 皇九叫四億

不過紀惠旗下寫字樓租金都企得幾硬淨,唔少近排續租或者新租嘅租金,都有約三成增幅。

高力國際就同劉Sir講,中環甲級寫字樓租金已連跌兩季,繼舊年第三季按季跌1.5%後,第四季再按季插1.7%。至於買賣方面,由於中區新供應幾近零,唔少業主放盤叫價好進取,美聯商業蕭惠碧話,依家放緊盤嘅中環皇后大道中9號8樓全層,業主呎價睇2.9萬元以上,涉差唔多4億元,相比佢兩年多前購入價,高近一倍。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

劉Sir

證券行提早撤租的海富中心二座中層,業主將分間成十二個單位出租。(資料圖片)

紀惠湯文亮認為,中區有甲級商廈錄低租金成交,只屬個別事件。(資料圖片)