股海實戰：神州數碼大有錢途

尋日，IMF話歐洲金融風暴可能拖累中國GDP降四個百分點，但呢個立論基礎係假設歐洲金融風險再度上升，而中國又冇採取內部政策應對，現實卻係打從去年十月開始中國拋出嘅「微調」論，已着手應對歐債亂局嘅風險，雖然為免市場誤會調控方向逆轉，人行千方百計不動存備率，但就不斷透過其他途徑緩解市場流動性壓力，故對中國經濟前景展望又毋須過於悲觀。

證券行醞釀裁員潮

講開內地，尋日同一個專門做表叔大客嘅中資行卜架食飯，聽佢講喺表叔客圈子中，呢一浪唔係人人都賺到錢，皆因升浪唔係由政策改變又或係資金流逆轉所推動，只有部分表叔敢撐船出海試水溫，而且上到21,000點邊大部分好倉經已食胡。

呢位仁兄仲話，今年初以來，唔單只外資行大減人手，就連中資行都人人自危，某已上市內地大型券商香港證券部高層便要個個減薪，另某中資銀行香港證券部就進行重組，減咗幾十個卜架，畢竟成個市場都縮咗水，養唔起咁多人，好在呢位仁兄嗰TEAM過去冇大肆招人，依家先至唔使成為刀下人咁話！

阿莊聽完都有啲唏噓，睇嚟大家都要接受一個事實，就係全球股市急速膨脹嘅日子已成過去，大時代經已結束，嚟緊金融市場會持續收縮，後遺症尚未完全浮現，近半年股市BUY、SELL SIDE規模都大不如前，正好係佐證。

回說尋日市況，執筆時希債談判尚未有結果，債仔惡晒，真係冇佢辦法！港股方面，恒指繼續喺21,000點關前進行整固，阿莊對恒指能一口氣向上回補八月初嘅大型裂口位，信心唔係好大，呢啲位都係睇定啲好！

異動股中，尋日吸引阿莊目光嘅，唔係九流股仔，而係基金愛股神州數碼（00861），股價曾高見13.64元，收報13.44元，升6%，成交增至1.29億元，主要買盤包括滙豐及高盛。

橫行咗三個多月終於動身，原來有大行發表報告，預計未來五年內地IT開支每年增加11至13%，而神數作為行業龍頭，應可分一杯羹，故首予「增持」評級。

查實阿莊亦都多次提及神數，近幾年公司成功轉型，開拓IT相關服務業務，為銷售增長注入新動力，喺內地加快城市化及支持中小企發展嘅政策下，無論係企業抑或城市人口管理及運輸交通等基建，對IT服務需求有增無減，神數「錢」途值得憧憬，尋日一支大陽燭有交投配合，若成功踢穿頂部阻力14元關，相信快見16元，50日線支持喺12.35元。

Tip股我至Top

錢進（1/30）Tip熔盛重工（01101）最多升17%

暴炒男（1/31）Tip華能國際（00902）最多升7%