樓市出更：搶租二線舖畀貴3成爭贏

呢幾年外圍經濟認真麻麻，但係香港零售業表現就出奇地好。有代理行高層話，舊年核心區舖租升幅超過三成，佢喺香港差唔多廿年，都從來未見過咁旺；事實上，二線地區舖租亦靜靜起革命，聽講喺元朗開業多年嘅一間24小時營業餐廳，衝出新界區，以每月22萬元喺油麻地搶租舖位，新租金較舊租上升接近三成，係近年二線區罕見。

舊年歐洲唔少國家嘅經濟問題逐一爆煲，香港有賴內地豪客來港血拚支持，一線區零售舖租飆升。第一太平戴維斯租賃部主管黎達志（Nick）同劉Sir講，舊年零售核心區舖租升幅驚人，計吓數差唔多升咗32%，佢喺香港廿年都未見過咁勁。雖然歐債問題短時間好難完全解決，但對本港零售前景仍然樂觀，Nick話一線靚舖租金全年睇再升一成半。

而該行商舖部董事麥蘇珊就話，雖然有人話農曆新年期間，部分鐘錶店生意好似比預期差，佢話可能因為剛過去聖誕節及農曆新年太接近，消費集中喺前段，以及部分人選擇外遊所致。其實，鐘錶店依然好積極搶位。佢仲話，近年唔少大型商戶除咗喺核心區搶舖外，亦開始喺九龍同新界大商場租舖。

藥房高33%租灣仔舖

零售經濟好，各階層嘅消費都明顯改善，利嘉閣（工商舖）劉偉成（Terence）同劉Sir講，話二線區油麻地彌敦道466至472號地下C、D舖，原本由傢俬店租用多年，業主早前放租，無幾耐即刻有四個商戶問盤，業主最終揀咗上述24小時營業嘅連鎖餐廳。

Terence話，個新租客間餐廳本身喺元朗及天水圍經營多年，睇中九龍人多車多，啱晒佢哋嘅經營模式，加上中港車站喺附近，所以出價去到每月22萬元，呎租差唔多73元。另外，中原鍾浩文話灣仔亦有搶租，其中軒尼詩道350至354A號地下1A號舖，面積大約1,700方呎，藥房早前以每月約16萬元搶租，租金較前租客髮廊高出三成三。