Fundman睇市：瑞聲科技等待iPhone5

聯儲局首次在議息聲明中加入利率預期，指美息將維持於0至0.25厘的超低水平，直到二○一四年，亦歷來第一次確定通脹目標在2%。有兩年平錢可借，聲明一出，令前晚華爾街股市由跌轉升，道指倒升81點收市。

香港處身在中美兩個巨型經濟體之間，估計祖國未來兩年不難維持大約每年8%的經濟增長，但在聯繫匯率下，本港息口卻要緊盯美元，簿仔息至少仲有兩年半繼續喺零水平，好彩的話，未來一年通脹回到大約3至4%，即使唔問風水先生，都知買樓、買股未必會實贏，但揸住銀紙睇住日日貶值，幾乎肯定會係大輸家。講到底，伯南克水浸市場策略，目的只得一個，就係借助超級流動性助長投資，以曲線去刺激實體經濟。歐洲透過長期再融資操作（LTRO）實行變相QE，加上美元低息承諾，睇嚟想恒指回到18,000點甚至16,000點，機會已微乎其微。

過去十一個交易日，恒指升足九日，大抵可以反映出去年底成手現金，煩緊點樣追番恒指升幅的基金經理，乃市場大多數，恒指9天RSI升穿80的極度超買區間，去到81.4，係過去一年都未見過，但超買唔代表見頂，超買後可以更超買，讀者最好咪盲目走去為淡而淡。

零食股第二季再諗

港股龍咁威，農曆年假後首個交易日升328點，報20,439點，三隻內銀股貢獻85點，兩隻內險股亦帶來37點進帳，藍籌中表現最差要數康師傅（00322）及旺旺（00151），分別跌0.6元及0.11元，報22.8元及7.4元，如果係兩隻股份的捧場客，都知送禮用的米餅及方便麵，在春節前需求最大，但假後兩三個月就會減價促銷，往往是全年毛利及產品單價表現最差的時間，股價亦然，捧場客或者可以畀些少耐性，等到第一季尾第二季初再諗。

挾淡友外，港股無太多新聞，容筆者講吓古仔。早兩日，蘋果公司公布教主喬布斯逝世後首份季度業績，截至十二月底止的一季，銷售額及純利大升73%及118%，達到463億及131億美元（相當於3,611億及1,021.8億港元）。當個個指摘iPhone4S設計無新意，同iPhone4外表一模一樣，偏偏過去一季銷售就達3,704萬部，比去年iPhone4多出足足一倍，亦首次佔蘋果公司收益超過一半，雖然身為果粉的筆者，都佔了當中的4部，但和大部分分析員一樣，對蘋果的這份季度業績，只能夠講句「估佢唔到」。

話蘋果公司富可敵國，應該無人反對，季報顯示這家出了名不派息的科技巨頭，手上累積現金達到980億美元（或者每股104美元），差不多等於奧地利整個股市市值，或者去年葡萄牙全國GDP的五分之二。更誇張的是，投資傳統話公司保留太多資金，股本回報率會被閒置的資本拉低，可是睇番○七至一一年，其股東資金回報率不跌反升，由28.5%升至41.6%，確已足夠使一班逼蘋果派息的基金經理，啞口無言。

富士康議價能力弱

蘋果公司之強，除了源於出色的科研及推廣伎倆外，跟周邊零售供應及組裝公司議價能力之弱，亦不無關係。觀乎其毛利率由五年前33.1%升至40.4%（最新一季44.7%），反而其最大OEM供應商富士康（02038），過去一年都在「蝕住做」。至於有份供應iPhone、iPad等產品微型喇叭的瑞聲（02018），昨日股價升至大半年收市新高，可是卻有點反高潮味道，由最多升0.9元，到收市升0.46元，報19.96元，成交也比一月初起步時減少。

筆者開始有點疑惑，到底係一二年市盈率13.5倍的瑞聲抵，抑或得10.7倍（或者減現金後8.1倍）的蘋果吸引，尤其投資者與用家都在期待年中曝光的iPhone5，或許瑞聲股東，不妨同時買點蘋果公司股票。