短炒倉：中旅短炒旺季效應

放完連續四日嘅聖誕長周末假期，真係心都散晒。睇番假期前港股雖然反彈，但成交縮到300億樓下，真係「認真你就輸鳥」。睇怕今年餘下的三個交易日都會係淡靜格局，一切都等到明年至算。

當然，內地近幾年不時揀喺大時大節出新政策，市場亦憧憬短期會有再減RRR或其他放水行動，淡市中博一博政策股，亦難保唔會有意外驚喜。就好似假期前中山官員表示，限價令本月三十一日到期後，明年將不再延續，就令市場憧憬官方對樓市調控有鬆動，一眾內房股上周五齊齊炒上，志強當日推介嘅中國海外（00688）升近3%，乘勝追擊，不妨吼實另一龍頭恒大（03333）。

恒大早前公布十一月銷售大跌八成半，睇落好似好驚嚇，但查實只係因為公司今年銷售早已達標，有條件企硬唔減價，才令銷售急挫，實質係好消息，大行亦相當睇好恒大，花旗定目標價6.02元，德銀更睇到8.3元，相比恒大上周五收報3.36元，即係話仲有一倍有多嘅上升空間，都咪話唔誇張。保守啲睇，恒大之前在十月尾十一月初，曾兩度受制於3.8元水平，可視為下一阻力所在，支持位睇3.2元。

恒大地產（03333）

阻力位：3.8元

支持位：3.2元