Fundman睇市：領匯長揸收息抗通脹

幾日假期眨吓眼又過，假期前港股乾升250點，報18,629點，沽空佔成交比例升至9%，但睇見成交額縮到得282億，再創延長交易時段之後新低，任何技術指標的啟示性都大打折扣，仲有三個交易日就踏入二○一二年，睇怕唔到300億成交的悶市，仲有機會在未來幾日繼續出現。

正當全人類期待人行在春節前再度減存款準備金率，放水救市之際，周末，統計局局長馬建堂接受訪問，認為中國經濟增長速度雖然回落，可是整體仍然是平穩較快範圍運行，警告物價有可能反彈，宏觀經濟政策對物價上升仍需保持警惕。對期望放水的，有關言論等同一盆冷水照頭淋。滬綜指周二復市一度反彈，最後都要倒跌1%收場。儘管內地消息話短期可能再有官方機構，調撥近百億元人仔入市增持金融股，但內地股民完全不放在眼內。

微調不宜期望過高

記得十一月三十日人行突然減存款準備金率前夕，亦有主管內地貨幣政策嘅官員，勸市場唔好期望人行短期有放水行動，今次會唔會又要營造「出其不意」效果，再來一次「推左走右」？史提芬估計機會唔細，只係上次減RRR，三日之後A股已經打回原形，似乎不宜對人行政策微調推高股市抱太大期望。

領匯（00823）宣布繼洽購私人物業麗港城商場後，又再有收購行動，假期前表示，擬以5.884億向信置（00083）收購將軍澳海悅豪園（Maritime Bay）商場，預期交易在一月二十日完成。

自○五年十一月上市，領匯掛牌剛好六年，期間完成廿二個商場的翻新升格行動，總共投資17.71億，完成資產提升物業佔總收益大約四成，目前公司計劃作資產提升的項目仍有十八個，涉及資金14億。如果以項目計數，領匯透過翻新舊商場，提升整體租值的計劃，完成了接近一半，作為上市機構，目標必然是為股東追求最大回報，由主攻翻新舊商場，轉向私人項目埋手，透過收購、翻新、提升租值可說是合情合理。問題是，香港唔少商場都在大型發展商手中，地產商有效的配套亦搞唔掂，或者嫌項目太細，食之無味落到領匯手裏，對後者而言，的確是一個相當大的考驗。尚幸是，領匯上市初期，手上資產也太多是這類型的雞肋，這幾年的表現，應該比較能令股東們放心。

一九九八年落成入伙，總樓面面積63,466平方呎的海悅豪園零售物業，收購代價約佔領匯九月底資產總值約0.79%，由估值報告，項目每月租金大約230萬元，二○一二年物業初始回報率4.8厘，稍高於領匯現價的派息回報，但規模應不足對業績有即時大幫助。然而，項目連接了領匯現有兩個區內項目，包括將軍澳南豐廣場及坑口厚德商場，在管理上可望起到協同效應，提升整體回報。

美國聯儲局可能將零息期延長至二○一四年，以約4.4厘回報，領匯仍會是好息之徒的首選，何況美國繼續印銀紙，歐洲央行也推出變相QE，低息借錢給商業銀行買「歐豬」債套息的行動，可能掀動通脹，推升資產價格，28元水平買領匯，風險應該十分有限。