股海實戰：東風候回吐分注買貨

聖誕假期眨吓眼就過，再過三個交易日又到元旦假期，唔少投行朋友喺聖誕假前經已做好晒工夫，一於放埋元旦假先至再埋位做嘢。故繼上周五港股成交低見282億元後，相信嚟緊呢幾日交投會持續偏靜，如無意外，恒指可企喺萬八點樓上作結，為一一年嘅跌市畫上句號！

即將踏入一年之始，中央嘅一號文件每每成為市場焦點。近幾年一號文件都以「三農」問題為重點，相信今年亦不例外，繼去年話要大搞水利之後，今年可能會以提升農業技術為主題，這可包括農業機械嘅運用、提升種植技術等各個方面，以加快農業產業化和城鄉化，推動經濟增長。

今年一月，阿莊亦曾喺一號文件出台前建議留意第一拖拉機（00038），點知股價走低，翌月初始見底，到四月見全年高位。所以呢次阿莊決定按兵不動，等明年一月中後再作決定。

除咗一號文件之外，下個月市場焦點亦離不開阿莊早前提及極具分量嘅全國金融工作會議。前日人仔兌美金匯價創十七年來新高，估計今年人仔升值介乎4至5%。據講今次會議重點議題之一正係人仔匯率市場化。究竟嚟緊一年人民幣匯率會否逆轉？阿莊認為年內匯率升跌係平常事，但人仔升值依然係大方向，只係升值步伐會受到經濟增長放慢影響而略為放緩而已。

每年新春過後，內地車市例牌淡靜，所以嚟緊一個月各車廠都積極推銷，以求喺淡季來臨前爭取定單。講到汽車股，東風（00489）股價自本月中見低位11.5元後持續回升，已連現六支陽燭，上周五收市報14.1元，乃八月三日以來收市新高。

推新車款有助銷售

觸發本輪攻勢的原因，市場傳聞甚多，有指東風擬於明年與富豪汽車喺湖北省成立合營，又一度傳出東風擬收購早前已申請破產嘅紳寶汽車資產，但公司已作否認。其實紳寶要到明年四月先至進入債務清盤程序，若然真係炒呢個消息，照計都唔會炒幾個月咁長！

從另一角度睇，今年首十一個月，內地十八家乘用車生產商銷量同比增長4%，首十一個月按年增幅為9%。相比之下，東風十一月份汽車銷量同比增6%，首十一個月按年增幅為11%，表現明顯較同業優勝，加上明年東風日產有新車款推出市場，難怪基金大戶要買貨過年，汽車股首選不離估值吸引嘅龍頭股東風。只是，經過連日急升，現時14日RSI抽咗上67，短線喺15元關前有獲利回吐並不足奇，中線可候回試13元邊始分注行事。