拍賣行嗌慘諗計過年

樓市吹淡風，政府繼續壓抑樓市，搞到啲私人拍賣行叫苦連天，好多拍賣物業翻叮多次都賣唔出，銀主盤減價千萬都無人吼，業主主動提出畀高啲佣金都無計可施。

劉Sir前排同環亞拍賣曾傑俊傾開，佢話今年物業交投萎縮嚴重，上半年佢哋拍賣成交嘅比例只得25%，下半年仲收窄至得番20%，睇怕今年公司生意額會錄得輕微虧蝕。而今年係佢公司開業十二年，表現第二差嘅一年，而最差嘅一年就係○三年沙士時。

多做宣傳 賣另類盤

其實近期唔少拍賣盤連拍幾次都未售出，好似前排有個藍籌屋苑車位開價只係10萬元，雖然現場有買家競投，但出價保守，所以到依家都未賣出。卓先拍賣潘子明話，山頂陽光花園有個銀主單位，減咗價成千萬元，但放盤三個幾月都未賣出。

忠誠拍賣鄭世傑話，近排有個別拍賣放盤業主已經主動畀多啲佣金，普遍由一般1%佣金，主動提出加到去1.5%，有啲甚至願意畀2%，不過整體承接力仍然麻麻。而世紀21拍賣陳東岳講，最近亦多咗業主要求做開放日，佢哋惟有努力做多啲宣傳同賣多啲廣告。

不過，噱頭嘅嘢佢哋都話唔會搞太多，好似曾經為咗搞旺個場而推出嘅免費餐券同抽獎唔會再做，因為效用唔大，情願落力啲搵肯平賣嘅拍賣盤，又或者銀主、凶宅呢啲另類盤。

睇番今年拍賣市場，由於政府多次出手壓市，令拍賣放盤開始由無咩受額外印花稅影響嘅工商物業撐住，可惜最近幾個月，外圍經濟唔明朗，令到工商物業都無運行。曾傑俊話，等過埋個農曆新年，希望到時銀行放番啲水，積聚嘅購買力又可以釋放番啲，做多啲生意。