股海實戰：A50值得睇位翻兜

期待已久嘅「放水」行動終於出現，除了人行宣布調低RRR之外，以美國聯儲局為首嘅六大央行，亦宣布聯手向市場注入流動性，刺激前晚外圍顯著走高，尋日恒指勁升1,012點，收報19,002點；國企指數亦重上1萬點心理關口，收報10,281點，升773點。

A股亦來個大反彈，滬綜指及深成指同升逾2%，兩市主板總成交金額顯著回升至1,760億元人仔。一如所料，尋日內地公布十一月製造業PMI指數為49，乃三十二個月以來首次降至50以下，已確認經濟增長出現放緩，一旦錯過出手嘅最佳時機，後果可大可小，只係沒料到人行出手之餘，聯儲局等六大央行會同一時間做嘢，將淡友殺個措手不及。

○八年救市先例可援

事實上，打從十月十日起匯金喺二級市場吸納工、農、中、建四行A股，已標誌國家隊動身托市，一個多月後就傳來人行宣布調低RRR，頓令阿莊聯想起○八年九月，人行為救市而宣布減息，並在當年九月及十月由匯金入場掃入工、中、建三行A股，情況確有雷同之處。

由於當年市場信心未完全恢復，故見滬綜指在救市政策開始後六個月仍維持反覆震盪，之後才展開大升浪。如今歐債危機未過，有理由相信尋日急升過後又會掉頭盤整，但有一點阿莊可以肯定，乃內地抽緊銀根嘅日子經已完結，下一次調低RRR嘅時間可能喺春節前後，未來數月中央頗大機會推出減稅及刺激消費嘅措施，這些都足以改善明年中資股嘅基調。

正由於預期股市即使重新醞釀升勢，亦不會一步到位，故買貨可以採取分注入市策略。阿莊計劃動用組合三成現金入市增持中資股，早前經已提過對上實城開（00563）總有一份情意結，想睇位買番，尋日見內房股氣氛甚佳，遂趁熱鬧入場以平均價每股1.55元先買入30萬股。

針對A股市場，滬綜指2,300點係浪底嘅可能性大增，估計嚟緊幾個月會維持喺2,300至2,500點水平上落，整固一段時間再因應政策向上突破。阿莊計劃分注翻兜A50中國基金（02823）作中線持有。估計中期單位價格波幅介乎10至12.5元，短線回吐至10.8元或以下，會考慮先落第一注。