尚御租盤逼爆頂爛市

今年下半年樓市受到多項不利因素夾擊，樓價升勢自然受阻，有唔少之前買入新盤單位嘅業主，見依家沽貨冇咩肉食，寧願將單位長揸，先行租出，令到有個別屋苑租金受壓，劉Sir近期同九龍塘地產代理老友傾開，入伙幾個月嘅尚御，暫時錄到2至3宗租務成交，其中一宗成交呎租只係24元，比起同區嘅畢架山峰同畢架山一號呎租要30元低約一成半至兩成。

聽老友講，尚御租金受壓，係因為租盤量多，現時該屋苑租盤中，可租、可售嘅單位約有30多個，佔已賣出單位約四成，不過租務成交唔算太多，暫時只有2至3宗，其中3座低層A室，面積2,086方呎，以每月5萬元租出，呎租低至24元；另一個1座中層B室，同以5萬元租出，呎租28元。

天巒交樓 放租未發市

兩個單位對比業主購入價，租金回報率只係得兩厘多啲。以九龍塘嚟講，每方呎30元唔使，就住到名校網嘅新樓，算係幾吸引，不過，該盤放租單位每方呎叫租仍然介乎30至逾38元。

踏入十二月份，市場有多個新盤入伙，上水天巒1期啱啱開始交樓，依家1、2期共有40多個租務放盤，月租介乎約5.5萬至20萬元，呎租約22至42元，不過暫時未聽到有成交。

懿峯快入伙 呎租40元起

至於買賣盤方面，現時1、2期加埋有160個，由於陸續入伙上會，有之前願意帳面蝕讓嘅業主，最近亦調高售價，好似有幢瑞奇大道洋房，業主買入價2,100萬元，之前希望上會前摸出，一度以2,050萬元蝕讓出售，但一直未獲承接，到最近見上會已事在必行，所以將意向價調高至2,200萬元。

至於港島西半山嘅懿峯，亦都預計喺年尾前交樓，依家租務放盤約5個，呎租叫價介乎約40至63元；而買賣放盤價由約2,800萬到約1.1億元，其中一個放盤呎價約4.7萬元最高。