市場徐想：三林環球穩陣可靠
三林環球（03938）主要業務係銷售原木木材，亦有製造同銷售膠合板同單板，如地板、刨花板、門等等，屬傢俬原材料生意。
睇番佢嘅業務，原木佔整體收入約四成半，可見三林幾倚賴賣木所得嘅利潤。三林嘅主要客戶係來自印度同中國，印度佔佢原木出口嘅三成左右，中國又佔三成左右。集團已經有好耐嘅賣木經驗，依家主要係鞏固自己現有嘅業務，不斷搵方法降低自己伐木成本。其他業務，包括地板產品及家庭產品、廚房廚櫃等等。佢嘅地板業務做得唔錯，集團亦善用大型製品遺下嘅膠材木材，製成各樣家庭產品，絕對係環保嘅先驅。
集團一一年盈利就增加咗六成幾，市盈率十倍左右。喺依家個個地方都講緊風險嘅時局，大家都會好驚間嘢拉閘執笠，你話係咪？三林好就好在作風穩健，債項好少，就算銀行收緊貸款，佢都應該能夠撐過呢個風浪。今時今日，穩陣最緊要！繼續追蹤、出發！