Fundman睇市：百麗跌得少買唔過

希臘仲未正式賴債，歐元區經濟已經開始半生不死，尋日歐元區公布九月製造業採購經理人指數（PMI）跌到48.5，反映經濟活動萎縮步伐加快，當中只有德國企在50的擴張線樓上，仍然有50.3，其餘通通在50樓下，意大利48.3、法國48.2、西班牙更得43.7，非歐元區的瑞士都差過預期，跌穿50去到48.2。早前大家仲期望中國好似○八年一役，投下四萬億人民幣搞基建，刺激環球經濟走出谷底，但近日的溫州走佬潮，金九銀十樓市冷風陣陣，同埋內地企業債券價格急跌，開始出現融資困難，中國國債五年期違約掉期溢價（CDS），上星期仲比法國高，能擔當支撐全球經濟復甦重任的國家，似乎中國已不在名單之列。

基金齊齊投身空軍

上星期美股大跌市收場，預咗港股唔會好過，恒指尋日開市無耐已經隊穿上星期低位16,999點，最低跌過875點，見16,717點，同幾個對沖基金經理傾過，問點解今次跌成咁，沽空額仲係有增無減，兼且無挾倉活動出現，老友話八、九月大部分行家都輸到「包頭」。對沖基金要第四季追補失地，唯一可做嘅係跟大勢，掉轉槍頭齊齊做淡，博大市整體Benchmark回落（基金表現指標，可以是恒指或者MSCI指數），同時間沽空執番多少，希望第四季outperform少少，有得同客仔解畫咁話。

亦因為咁，近期大市沽空佔成交比例居高不下，上星期三、五高見今浪高峰，去到13及14%，尋日亦有12%，被空得最誇張，佔本身成交超過五成的，尋日有八隻，部分屬估值高跌得少一類，依次係物美（01025）67.5%、青啤（00168）62.1%、東亞（00023）60.6%、華寶（00336）60.3%、龍湖（00960）58.9%、百盛（03368）53.6%、恒隆地產（00101）50.9%及遠洋地產（03377）的50.7%，看官不妨作為參考。

香港免紅酒進口稅，內地同胞又將飲貴酒變咗做身份的象徵，香港佔全球紅酒拍賣成交額愈來愈高。有好杯中物的好友是拍賣會常客，同史提芬講今次亦感受內地富豪有水緊的情況，估價最高的十幾個項目，未有好似以前咁大幅拋離估價成交外，來自內地買家出手都無過往咁豪，以前清一色貴酒盡歸「國有」的豪情，不復再矣。

聽老友一席話，立即教史提芬對奢侈品牌股短期情況，冷了一截，睇嚟普拉達（01913）三個交易日由高位隊近10元，並唔係毫無道理。另一隻散戶愛股百麗（01880），儘管同普拉達走的檔次並唔係完全一樣，但都係屬於中高級消費牌子，年初至今股價只係跌咗2.4%，大大跑贏大市，揸咗的真係要小心小心。

鞋王百麗上半年業績升29%，去到20.07億元，綜合大行估全年賺43.23億元，增長26.2%，以20.2倍市盈率，抵買比率PEG為0.77倍，唔算好貴，只係今日內需股通街跳樓貨，擔心跌得少的百麗，會畀芬佬睇中就弊傢伙，睇番海嘯至今，最低同最高估值分別係10.4倍及43.6倍，平均係26.7倍，現價折讓兩成四，係合理但未算好抵，想買的股民，睇嚟仲係等一等好啲。