股海實戰：大戶全方位沽空 散戶只宜靠邊站

內地十．一黃金周股市休市，淡友精心部署大追擊，狂唱內地民間借貸爆煲，國企指數再跌半成，繼續跑輸恒指。依家人心惶惶，市場充斥負面消息，日日係咁講內地炒家資金鏈斷裂，傳來傳去，最終恐怕冇事變有事，連正常嘅商業信貸活動亦受到影響。

八月份跌市時，阿莊話港股呢浪最差要睇萬六點，諗唔到十月首個交易日，恒指低位經已落到16,717點，尾市略有反彈，收報16,822點，跌770點，成交764億元。睇尋日沽空額有92億元，沽空比率仍達12%，單邊大跌市嘅格局未變。

沽空名單中，以金額計榜首係中移（00941），沽空額4.31億元；緊跟其後嘅係國壽（02628）同騰訊（00700），沽空額分別為3.7億元及3.68億元。此外，聯通（00762）同中海油（00883）沽空額同逾3億元。

睇淡人仔情緒升溫

呢期大戶咁大規模全方位沽空中資股，確實少見。事實上，除咗股票市場之外，最近喺匯市亦見到有熱錢針對人仔發動攻勢。上周美元兌人仔嘅中間價續創新高，但在岸人仔價卻連續三日觸及交易浮動下限，二者差價擴大，反映看空人仔嘅情緒正在升溫。班大炒家一邊唱空人仔，散布中資股坐享人仔升值優勢不再嘅恐慌，一邊大手沽空中資股，實行雙邊獲利。聽聞呢批大炒家唔係百分百老外，亦有中資參與，難怪睇得咁通透！總而言之，依家海外環境複雜，中國本身又被本土問題綁手綁腳，究竟北京點樣拆招，有待觀察。

環球金融市場已變成鱷魚潭，魚毛蝦仔入市只會淪為大鱷點心。阿莊冇咩心機繼續估底，只有叮囑看官一句，手上尚有持貨嘅話，短線空倉回補帶動反彈行情，有機會就要把握止蝕套現，且要做好心理準備，呢轉空軍沽夠，股海便會進入「冰河時期」，即係指數波幅細同成交低迷，淡市可能要歷時十二至十八個月始告完結！