股海實戰：神州數碼耐心等執平貨

港股終極一跌未見，但絕地反擊卻率先上演，尋日恒指一口氣抽升722點，收報18,130點。呢幾個月逢月尾指數例彈，加上本月底基金季結，相信周末前恒指會力撐喺17,800點甚而喺18,000點樓上做結算。但當然，港股已形成一浪低於一浪嘅走勢，踏入傳統股災月嘅十月份，恐怕低位要睇16,000點水平，有咩貨想甩手，就要好好把握呢一、兩星期嘅出貨機會。

阿莊喺九月廿日分別以3.09元及41.5元沽出中航科工（02357）及恒地（00012），沽出後唔夠一個禮拜，二者股價分別曾低見1.98元及36.5元，真係深深體會咩叫輸少當贏！而套現嘅百多萬元，泊入兩隻公用股煤氣（00003）及電能（00006），此期間股價充分發揮公用股嘅防守性，總算避過一劫！此外，組合中嘅瑞聲科技（02018），尋日獲券商調高目標價，股價借勢反彈上最高見16.4元，收報16.3元，升幅13%，希望下月中旬iPhone5推出市場前，呢項投資可順利返家鄉！

尋日提及嘅阿里巴巴（01688），分拆消息前日已公布，偏偏股價前日跌尋日先嚟升，主要係反彈市引發補倉潮以及受公司回購消息所帶動。阿莊維持原判，即現價不宜沾手，持貨者亦宜把握反彈機會沽貨套現。

國策股返值博水平

第三季全球股市備受歐、美問題困擾，就連被視為穩陣嘅內需、汽車、家電、建材等國策股，都通通「滿江紅」，市場情緒一下子落入低谷。不過，對於冇貨喺手，一直等股市調整嘅實力投資者，自然樂見其跌，事關終於見到啲心頭好估值落番值博嘅水平。

講到呢度，阿莊又諗番起隻神州數碼（00861），可憐近日股價跌穿10元關，低見9.8元，已回落至前年底去年初嘅起步位，股東睇見都神傷！但其實環球金融市場動盪，對神數嘅業務影響唔大，反而阿莊仍十分睇好其今年開始實施嘅「智慧城市」戰略轉型，事關隨着內地城市趨向電子化管理，集身份認證、資訊儲存、支付等功能嘅「市民卡」應用日趨普及，但呢個市場唔係外來人可以隨便參與，神數早前已夥同香港八達通進攻內地十個城市嘅市民卡業務，足顯其享有發展優勢。

以現價計，神數往績市盈率十倍、息率3.2厘，阿莊都有啲心動，但暫時會繼續戒急用忍，耐心等待十月來臨，睇吓執唔執到超筍貨！