樓市出更：旺角老舖大遷徙

西洋菜南街唔少七、八十年代已經落戶嘅民生店租戶，面對租值飆升，唔少要轉到鄰區。例如西洋菜南街一間舊式鞋舖，業主打算明年初租約期滿時，加租至每月百二萬；相信現有租客每日要賣差唔多一百對鞋，至夠交租。

過去十年，西洋菜南街一段地舖租戶幾乎全部大執位，由以往本地時裝及鐘錶等舊式商戶，轉為近年成行成市嘅連鎖化妝品、影音及跨國品牌潮流服式等等，租金亦水漲船高，呎租由約500多至1,000多元不等。响租金高昂之下，仍然無阻租戶搶灘意欲，目前該黃金路段空置率幾乎係零。

鞋舖加租1.4倍唔易做

中原黃東雄同劉SIR講，呢個租畀專賣各類鞋款嘅西洋菜南街地舖，面積約莫600方呎，每月租金約五十萬元，由於個舖坐落大街，人流量高，加上個位當眼，擺個廣告位都有着數，所以業主諗住加租去到每月百二萬，聽講依家已經有唔少連鎖鐘錶店、化妝品店及精品店攞緊資料諗緊搶租。

劉SIR估計，以新租金百二萬元計，每對鞋賣四、五百元，差唔多每日要賣成一百對，先可以夠畀租。

事實上，近年西洋菜南街唔少舊式民生店撤出，同樣喺附近一間經營咗約三十年嘅書局，面對租值狂升，與其交貴租畀人哋，不如自己買舖好過，故決定撤出上址後，轉購油麻地一地舖，繼續經營。