Fundman睇市：海爾增添炒作元素

美國經濟病入膏肓，歐洲一樣唔生唔死，中國緊縮貨幣，經濟同樣由熱轉冷作感冒中。今時今日，唔少人想借錢借唔到，有錢借畀人嘅，又怕有借冇還四圍去搵安全停泊之處，過去一星期全球金融市場立立亂，更能凸顯這避險心態。

紐約現貨金急升至1,673美元，改寫歷史新高，最誇張仲係短短幾日，十年美國國債息由3厘樓上碌到周二2.62厘，過去幾日大家仲怕緊美國可能還唔到債，一樣有人願意收取2.62%可恥回報借錢畀佢十年，依家到底咩世界？

以為美國通過放寬國債上限就無事，錯了！千祈唔好忽略歐洲經濟問題可能更嚴峻，睇番踏入第三季只係一個月多啲啲，「歐豬」五國股市已經跌到七個一皮，執筆時，意大利股市累積跌14.9%，西班牙跌11.9%，希臘跌11.7%，愛爾蘭跌9.1%，葡萄牙跌8.2%。

歐債隨時再爆大鑊

剛睇到份研究報告，話上星期西班牙被穆迪降信貸評級之後，市場揣測意大利可能成為下一個被評級機構放箭目標，主要係擔心本周五公布的第二季GDP會相當難睇咁話。

德銀身體力行，賭咗80億美元意大利CDS，估佢短期違約風險會上升，再睇意大利十年國債CDS溢價，十足十希臘出事前咁款，由七月下旬230點子左右，抽升至周二見342點子，升幅都幾得人驚。希臘經濟規模有限，擺平唔難，其他四隻歐豬點算？歐盟點拆彈？有待下回分解，但肯定會為股市帶來震盪。

藉美股急跌265點，淡友全面反攻，港股裂口低開405點後，全日反彈乏力，恒指兩萬二點不保，收報21,992點，跌428點，跌市成交不跌反升，去到819億元。展望周五美國就業數據恐怕凶多吉少，下星期祖國公布七月CPI，大行估計仲係6.4至6.6%的高位徘徊，支持大市反彈條件唔多，港股短期恐怕好難叻得去邊。

海爾電器（01169）是少數逆市奇葩，公司向另類投資基金凱雷投資發行10.67億港元可換股債券，為期五年，轉換價初步定位為每股10.67港元。上月底，母公司海爾集團透露，有意收購日本松下（Panasonic）旗下三洋電機的洗衣機、冰箱和其他家電業務，預料九月簽正式協定，市傳交易作價100億日圓（約10億港元），兩個交易時間接近，涉及銀碼實在太過巧合，自然使人聯想收購資產，最終目的是放入香港上市的子公司內。

凱雷行動惹人遐想

可換股債券的好處，係萬一喺五年後，海爾股價低於行使價，凱雷大可唔行使連本帶利袋錢走人。不過，肯以行使價10.67元承接換股債券，多少具參考價值。松下要賣三洋白家電主要原因係經營不善，相信即使最終由海爾接手，都需時間執靚盤數。反之，海爾注入銷售供應鏈管理業務後，業績大有起色，綜合渠道業務收入，佔整體13.3%升至去年79%，去年業績翻一番賺9.64億元。

中央大力推行保障性住房，白家電市場預期會興旺多三至五年時間，海爾一二年市盈率10.4倍，即使撇開注資概念，都幾吸引，凱雷的入股會引起更多機構投資者關注，昨日的大成交抽升，可能只係新一輪升浪的開始。