股海實戰：潤電深得芬佬歡心

呢頭美債問題解決，嗰頭又要擔心經濟衰退，結果金魚缸再現沽售潮。香港魚缸亦現大幅震盪，恒指最低見過21,882點，收報21,992點，跌428點，成交大增至近820億元，沽空額69億元，當中中國建材（03323）沽空額達3.09億元，沽空比率高達31.5%，盈喜消息係機會，也可能係陷阱！

睇番美股道指幅走勢圖，前晚已回落至上月低位水平，一旦失守，下一個位睇三月份低位11,555點。若然短期外圍持續走低，港股係咪跟住穿底就好睇A股。內地下周公布七月份CPI，官方傳媒已預先出口術叫大家做定加息嘅心理準備。睇嚟阿莊月初話呢月份股市可能先低後高，不幸言中了一半！

金價料高處未算高

雖然尋日恒指唔見四舊，但金魚缸仍搵到跌市奇葩，就如獲花旗唱好嘅人和商業（01387），股價最高見1.82元，收報1.8元，升13.92%，成交達到3.19億元，花旗話每股值2.49元，現價與之仍有距離。

不過，另一大行高盛最近發表報告，調低內地百貨股盈利預測，以反映行業面對成本上升風險，以及專櫃毛利率下降。若內地百貨業經營壓力增加，對於相關物業租賃需求亦可能受到影響，所以都係一動不如一靜。

正由於全球沒有一個市場可以讓資金安全容身，金市頓成資金避難所，紐約現貨金價再創新高，達每安士1,673美元，睇嚟好快見每安士1,700美元。金礦股招金礦業（01818）尋日逆市走強，高位16.5元，收報16.46元，升6.3%，成交1.49億元。若然睇好金價表現，招金可視為首選。

呢大半年買股票嚟揸，除非咁勇長坐大型金飾股，否則十居其九要輸錢，但老實講，論基本因素，啲大型金飾股股價係咪真係值得升咁多，真係見仁見智。講白啲，呢類股街貨唔多，之前批過浸貨畀對沖基金，班大帝一味挾高股價，既可抬高持股組合價值，又可避過跌市，做到跑贏大市嘅效果。然則呢啲位冇貨喺手又好唔好追貨，阿莊唔想阻人發達，由各位自行判斷！

憧憬內地電價調整

最近幾隻中資電力股華電（01071）、大唐（00991）及華能（00902）股價都創五十二周低位，皆因成本上漲，但通脹之下電價升幅之微無助止蝕，結果做多蝕多。不過，若然七、八月份CPI真係見頂，下半年電價有機會獲鬆手調整，加上處於發電量高峰期，身處低位嘅電力股仍值得關注。

相比以上3隻電力股，華潤電力（00836）可謂一顯「華潤」系股份嘅品牌優勢，今年嘅股價表現跑贏同類股及恒指。近年潤電業績表現，足以證明管理層開源節流嘅能力，加上近年購併效益不斷展現，難怪一班持貨嘅基金股東不變心，嚟緊股價應該可以繼續跑贏大市。

戰報

和電香港（00215）

姚午齊於七月二十二日睇中和電香港，冧市抗跌力強，昨日高位見2.89元，較推介時低位有一成升幅。

國際泰豐（00873）

暴炒男昨日成功追蹤國際泰豐，一舉升至高位4.81元收市，及時上車不難執到一成半利潤。