魚缸Blogger：華寶盈利有保證

外圍市況風雲色變，道指前晚急挫265點、金價創新高，避險意識強烈，累及恒指尋日大跌428點，報21,992點。而筆者強調嘅22,000關亦瞬間失守，目前惟有寄望上月低位21,611點能夠頂得住。

大市急回，連強勢嘅零售同水泥股尋日都要虎落平陽，但筆者始終認為有關板塊仍會係今年焦點，值得逢低買進，而尋日本欄推介嘅國際泰豐（00873）可算是神來之筆，逆市急升11%，至於今日就順手搵來隻華寶國際（00336）。

生產線陸續投產

華寶主要喺內地從事產銷應用喺香煙上嘅香精香料，雖然股價早前受行業前景轉差、基金沽貨等影響，但原來公司都係國策受惠股，「十二五」規劃中將會把煙草薄片列為重點項目。有見及此，華寶舊年已經收購廣東金葉集團，進軍煙草薄片業務，而未來亦將有多條生產線投產，加上內地進口煙嘅比例不足1%，所以盈利前景仍會唔錯。

雖然華寶股價曾由六月高位10.94元下跌近半至5.52元，但喺6元已初現支持，不妨人棄我取，喺6.5元附近跟進，先睇7.5元，止蝕6元。

華寶國際（00336）

目標價：7.5元 止蝕價：6.0元